جامبىل وبلىسىندا بالالاردىڭ جازعى دەمالىسىنا 315 ميلليون تەڭگە جۇمسالادى
وندا بالالارعا ارنالىپ ءتۇرلى مادەني جانە سپورتتىق ءىس- شارالار ۇيىمداستىرىلادى، دەپ حابارلايدى قازاقپارات جامبىل وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
جازعى دەمالىسپەن ءوڭىر وقۋشىلارىن 100 پايىز قامتۋ جوسپارلانۋدا. بۇل 1-10 -سىنىپ ارالىعىندا ءبىلىم الىپ جاتقان 196566 وقۋشى.
ولاردىڭ اراسىندا جەتىم، تولىق ەمەس وتباسى جانە مۇمكىندىگى شەكتەۋلى بالالار ساناتتارىنا جاتقىزىلعان 60451 وقۋشى بار. وڭىردە تابيعاتى ەرەكشە جامبىل، جۋالى، بايزاق، قورداي، مەركى، رىسقۇلوۆ جانە سارىسۋ اۋداندارىندا ورنالاسقان التى مەملەكەتتىك جانە ءتورت جەكەمەنشىك ساۋىقتىرۋ لاگەرى جۇمىس جاسايدى.
قالا شەتىندە ورنالاسقان بارلىق لاگەرلەر زاماناۋي قۇرىلعىلارمەن جاراقتاندىرىلىپ، ويىن جانە سپورتتىق الاڭدارمەن، باسسەيىندەرمەن جابدىقتالعان. سونداي- اق بالالار ءۇشىن مەكتەپ جانىنان شاتىرلى لاگەرلەر، رەسپۋبليكالىق ساۋىقتىرۋ ورتالىقتارى، اۋلالىق كلۋبتار اشىلادى. ەكسكۋرسيالار، تۋريستىك باعىتتار، سپورتتىق جارىستار، ۇيىرمەلەر مەن ەڭبەك جاساقتارى جۇمىس جاسايتىن بولادى. ءار مەكتەپتە ءتۇرلى ينتەللەكتۋالدىق ءىس- شارالار جوسپارى ازىرلەنگەن. ءبىلىم بەرۋ قىزمەتكەرلەرىنىڭ قاتىسۋىمەن قالا شەتىندەگى لاگەرلەر مەن مەكتەپ جانىنداعى الاڭداردا اعا تالىمگەرلەر ءۇشىن وقۋ سەمينارلارىن وتكىزۋ جوسپارلانۋدا.
الەۋمەتتىك جاعىنان از قامتىلعان وتباسىنان شىققان 5691 جانە 70 دارىندى بالا مەملەكەتتىك بيۋدجەت ەسەبىنەن ەكسپو-2017 كورمەسىن تاماشالاي الادى. بۇدان باسقا، جاز مەزگىلىندە قازاق- تۇرىك مەكتەپ- ينتەرناتتارى بازاسىندا اعىلشىن ءتىلىن وقىتۋ ءۇشىن جامبىل ج و و- نىڭ ستۋدەنتتەرىن ەرىكتى رەتىندە تارتۋ دا جوسپارلانىپ وتىر.
وبلىس اكىمدىگى بالالاردىڭ جازعى دەمالىسىن قارجىلاندىرۋ كولەمىنىڭ جىل سايىن ءوسىپ وتىرعاندىعىن اتاپ ايتتى. 2015 -جىلى جەرگىلىكتى بيۋدجەتتەن 243,2 ميلليون تەڭگە، 2016 -جىلى - 280,9 ميلليون تەڭگە بولىنگەن. ال بيىل بالالاردىڭ جازعى دەمالىسىن ۇيىمداستىرۋعا جەرگىلىكتى بيۋدجەتتەن 315,2 ميلليون تەڭگە كوزدەلىپ وتىر.