تايۋان پوليتسياسى 315 مىڭ دوللارلىق ماشينانى بولشەكتەپ تاستادى

استانا. قازاقپارات - تايۋان پوليتسياسى دۇرىس ءنومىرى بولماعاندىقتان تاركىلەنگەن  Lamborghini Murciélago سۋپەركارىن بولشەكتەپ، قيراتىپ تاستادى.

 2013 -جىلى تايۆان جول پوليتسياسى Lamborghini اۆتوموبيلىن تەكسەرۋ ءۇشىن توقتاتقان. وعان ورناتىلعان ءنومىر وزگە ماشيناعا بەرىلگەن بولىپ شىقتى. سپورتتىق كولىك تاركىلەنگەن. ونىڭ يەسى ءۇش جىل بويى سۋپەركاردى قايتارماققا ارەكەتتەندى، ءبىراق ودان تۇك شىقپادى.

 پوليتسيا قىزمەتكەرلەرى اسا قىمبات ماشينانى قوقىس تاستايتىن جەرگە اپارىپ، جينالعان جۋرناليستەردىڭ كوزدەرىنشە، ارنايى تەحنيكانىڭ كومەگىمەن بولشەكتەپ تاستادى، دەپ جازادى Mashable باسىلىمى.

 Lamborghini Murcielago كولىگى 2001-جىلدان 2010 -جىلعا دەيىن عانا شىعارىلعان. وسى ۋاقىتتىڭ ىشىندە بار- جوعى 4099 اۆتوموبيل قۇراستىرىلدى. ال قيراتىلعان سۋپەركاردىڭ قۇنى 315 مىڭ دوللاردى قۇراعان.

اۆتور: ەرلان قوجاكەلديەۆ