تاربيەشىلەردىڭ جالاقىسى وسى ايدا %30 عا ارتتىرىلادى

استانا. قازاقپارات - قىركۇيەكتەن باستاپ مەكتەپكە دەيىنگى تاربيە جانە ءبىلىم بەرۋ پەداگوگتەرىنىڭ جالاقىسى تاعى %30 عا وسەدى. ەلىمىزدە قازىر 97 مىڭ تاربيەشى بار، دەپ حابارلايدى قازاقپارات وقۋ- اعارتۋ مينيسترلىگىنە سىلتەمە جاساپ.

جالاقىنى جىل سايىن ارتتىرۋ 2020 -جىلدىڭ قاڭتارىنان باستاپ مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ كەلەدى.

مەكتەپكە دەيىنگى ءبىلىم بەرۋ جۇيەسىنىڭ كادرلىق الەۋەتىن كۇشەيتۋ ماقساتىندا 20390 پەداگوگ كاسىبي بىلىكتىلىكتەرىن ارتتىرادى. 79 مەكتەپكە دەيىنگى ۇيىمدا «قۇزىرەت ورتالىقتارى» جۇمىس ىستەيدى. مۇندا تاربيەشىلەر ءوزارا تاجىريبە الماسىپ، ۇزدىك جۇمىستارىمەن بولىسەدى.

سونىمەن قاتار، ۇكىمەت بالاباقشالاردا جاڭا ورىندار اشۋ بويىنشا شارالار قابىلداپ جاتىر. جىل باسىنان بەرى 29620 ورىنعا ارنالعان 307 مەكتەپكە دەيىنگى ۇيىم پايدالانۋعا بەرىلدى. جىل اياعىنا دەيىن بالاباقشالاردا بارلىعى 81 مىڭ، ال 2025 -جىلعا دەيىن 223 مىڭ جاڭا ورىن اشۋ جوسپارلانىپ وتىر.