ستۋدەنتتەر وتكەن عاسىردىڭ 30-جىلدارىندا سالىنعان كونە جاتاقحانالاردا تۇرۋعا ءماجبۇر
«قازىر ءبىز 11 وڭىردەگى جاتاقحانالاردى تەكسەرىپ جاتىرمىز. ۋنيۆەرسيتەتتەر بويىنشا ءبىز تەكسەرگەن جاتاقحانانىڭ 70 ءسىن جاقسى دەپ ايتۋعا بولادى. 39 ى ورتاشا، 2 جاتاقحانادا قۇرىلىس ءجۇرىپ جاتىر. كوللەدجدەر بويىنشا جالپى 126 جاتاقحانانىڭ 75 ءى جاقسى. 36 سىنىڭ جاعدايى ورتاشا، 13 ءىنىڭ جاعدايى ناشار، 2 جاتاقحانادا تۇرۋ مۇمكىن ەمەس»، - دەدى ول.
ونىڭ ايتۋىنشا، مونيتورينگ بارىسىندا 11 جاتاقحانادا سانيتارلىق جانە قاۋىپسىزدىك نورمالارىنىڭ ساقتالماۋى، سۋ كراندارىنىڭ جۇمىس ىستەمەۋى، وقۋ زالدارىنىڭ ءتيىستى ماقساتتا پايدالانىلماۋى، ستۋدەنتتەردىڭ بوس ۋاقىتىن ءتيىمدى وتكىزۋگە ارنالعان ورىنداردىڭ جوقتىعى اشكەرە بولعان.
«سونداي-اق كەڭەس ۇكىمەتى كەزىندە سالىنعان جاتاقحانالار قايتا جوندەۋدى قاجەت ەتەتىنى نەمەسە تۇرۋعا مۇلدەم قولايسىز ەكەنى انىقتالدى. بىلايشا ايتقاندا، ەسكى زاماننان كەلە جاتقان جاتاقحانالار بار. كەي جەرلەردە ءبىز 1930-جىلى سالىنعان جاتاقحانالاردى كوردىك. مىسالى، وڭىردەگى ءىرى جوعارۋ وقۋ ورىندارىندا وسىنداي جاعداي كەزدەسەتىنى كوڭىل كونشىتپەيدى»، - دەدى نۇرجان جەتپىسبايەۆ.
وسى رەتتە ول ونداي وقۋ ورىندارى قاتارىندا ۇلىتاۋ وبلىسىنداعى ءومىرحان بايقوڭىروۆ اتىنداعى جەزقازعان ۋنيۆەرسيتەتىن، قىزىلوردا قالاسىنداعى قازانعاپ اتىنداعى قىزىلوردا مۋزىكالىق كوللەدجىن، اقمەشىت گۋمانيتارلىق-تەحنيكالىق ينستيتۋتىن، قاراعاندى وبلىسىنداعى تەمىرتاۋ كاسىپتىك-تەحنيكالىق كوللەدجىن، پاۆلودار وبلىسىنداعى جاياۋ مۇسا اتىنداعى اقسۋ جوعارى كوپسالالىق كوللەدجىن، الكەي مارعۇلان اتىنداعى پەداگوگيكالىق ۋنيۆەرسيتەتىن، سولتۇستىك قازاقستان وبلىسىنداعى پەتروپاۆل جوعارى قۇرىلىس ەكونوميكالىق كوللەدجىن، گۋمانيتارلىق- تەحنيكالىق كوللەدجىن، اباي وبلىسىنداعى رىمبەك بايسەيىتوۆ اتىنداعى سەمەي قارجى ەكونوميكالىق كوللەدجىن، الماتى وبلىسىنداعى جاندوسوۆ اتىنداعى قاسكەلەڭ مادەنيەت كوللەدجىن اتادى.
«مۇنداعى جاتاقحانالاردى جاعدايى ورتاشادان تومەن. بۇل باعىتتا تىڭعىلىقتى جۇمىس ىستەۋ كەرەك»، - دەدى ول.
