وقۋشىلاردىڭ ساباقتا 30 مينۋتتان ارتىق تەلەفون قولدانۋىنا رۇقسات جوق

استانا. قازاقپارات - «ءبىلىم بەرۋ وبەكتىلەرىنە قويىلاتىن سانيتاريالىق-ەپيدەميولوگيالىق تالاپتار تۋرالى» ق ر دەنساۋلىق ساقتاۋ ءمينيسترىنىڭ بۇيرىعىنا وزگەرىستەر مەن تولىقتىرۋلار ەنگىزىلمەك. سانيتاريالىق-ەپيدەميولوگيالىق باقىلاۋ كوميتەتى اشىق تالقىعا شىعارعان قۇجاتتا مەكتەپالدى جانە جوعارعى سىنىپ وقۋشىلارىنىڭ ساباقتا گادجەتپەن جۇمىس ىستەۋ ۋاقىتىن بەلگىلەۋ ۇسىنىلعان، دەپ حابارلايدى قازاقپارات ءتىلشىسى.

«مەكتەپالدى سىنىپتارداعى ساباقتىڭ بارىنشا رۇقسات ەتىلگەن ۇزاقتىعى - 25-30 مينۋت. سونىمەن بىرگە ساباق سانى تورتەۋدەن اسپاۋى ءتيىس. ساباق اراسىنداعى ءۇزىلىس كەمىندە 10 مينۋت بولۋى كەرەك. اتالعان بۇيرىقتىڭ 21-تارماعىنا قوسىمشا «وبەكتىنىڭ جەرتولە جانە سوكولدىق قاباتتارىنداعى ءۇي-جاي ساۋلەت، قالا قۇرىلىسى جانە قۇرىلىس سالاسىنداعى مەملەكەتتىك نورماتيۆتەردىڭ تالاپتارىنا سايكەس ورنالاستىرىلادى» دەلىنگەن رەداكسيا جازىلسىن» دەپ كورسەتىلگەن قۇجاتتا.

جاڭا وزگەرىستەرگە ساي، ەندى وقۋشىلارعا ساباقتا دەربەس كومپيۋتەر، پلانشەت جانە نوۋتبۋك قولدانۋعا رۇقسات ەتىلەتىن ۋاقىت:

- مەكتەپالدى، مەكتەپكە دەيىنگى توپتاردا (سىنىپتاردا) جانە 1-سىنىپتاردا - 15 مينۋتتان اسپايدى؛

- 2-3-سىنىپتاردا - 20 مينۋتتان اسپايدى؛

- 4-5-سىنىپتاردا - 25 مينۋتتان اسپايدى؛

- 6-8-سىنىپتاردا - 25 مينۋتتان اسپايدى؛

- 9-11(12)-سىنىپتاردا - 30 مينۋتتان اسپايدى.