قاسىم-جومارت توقايەۆ قازاقستان-قىتاي قارىم-قاتىناسىنىڭ جاڭا «التىن 30 جىلدىعى» باستالعانىن مالىمدەدى
پرەزيدەنت قىتاي ءتوراعاسىنا شاقىرۋىن قابىل الىپ، ەلىمىزگە مەملەكەتتىك ساپارمەن كەلگەنىنە ريزاشىلىعىن ءبىلدىردى.
- بۇل - پاندەميادان كەيىن ءسىزدىڭ شەتەلگە العاشقى ساپارىڭىز. سوندىقتان وسى ساپارىڭىزدىڭ تاريحي ماعىناعا يە. مەن مۇنى جوعارى دەڭگەيدەگى ءوزارا سەنىم مەن ىنتىماقتاستىقتىڭ كورىنىسى دەپ باعالايمىن. بيىلعى 5- اقپاندا XXIV قىسقى وليمپيادا ويىندارىنىڭ اشىلۋ سالتاناتىنا قاتىسقانىمدى بىلەسىز. سول كەزدە بەيجىڭدە وتكەن كەزدەسۋىمىزدى ىقىلاسپەن ەسكە الامىن، - دەدى مەملەكەت باسشىسى.
كەزدەسۋدە قاسىم-جومارت توقايەۆ قازاقستان مەن قىتاي اراسىندا ديپلوماتيالىق قاتىناس ورناعانىنا 30 جىل تولعانىن اتاپ ءوتتى.
- ءسىزدىڭ ساپارىڭىز وسى مەرەيلى بەلەسكە تۇسپا-تۇس كەلىپ وتىر. قىسقا مەرزىم ىشىندە ءبىز تۇراقتى مەملەكەتارالىق قاتىناس ورناتتىق. ءسىز قازاقستان ەكونوميكاسىن دامىتۋعا جانە ءبىزدىڭ حالىقارالىق باستامالارىمىزعا ۇدايى قولداۋ كورسەتىپ كەلەسىز. سول ءۇشىن وزىڭىزگە زور العىس ايتامىن، - دەدى پرەزيدەنت.
قاسىم-جومارت توقايەۆتىڭ ايتۋىنشا، 2019-جىلعى قىركۇيەكتەگى بەيجىڭگە مەملەكەتتىك ساپارى كەزىندە قول جەتكىزىلگەن جان-جاقتى ماڭگىلىك ستراتەگيالىق سەرىكتەستىك جونىندەگى ۋاعدالاستىق ءساتتى جۇزەگە اسىرىلىپ جاتىر. بۇگىنگى بىرلەسكەن مالىمدەمە قارىم-قاتىناستاردىڭ جاڭا «التىن 30 جىلدىعىنىڭ» باستالعانىن بىلدىرەدى. سوندىقتان قىتاي ءتوراعاسىنىڭ بۇل ساپارى اسا ماڭىزدى.
