30-ماۋسىم. قازاقپارات كۇنتىزبەسى
اتاۋلى كۇندەر
حالىقارالىق استەرويد كۇنى العاش رەت 2015 -جىلعى 30-ماۋسىمدا اتاپ ءوتىلدى. بۇۇ باس اسسامبلەياسىنىڭ 2016 -جىلعى 6-جەلتوقسانداعى №71/90 قارارىمەن بەكىتىلدى. وسى كۇندى اتاپ وتۋدەگى ماقسات - استەرويدتار، ولاردىڭ جەرگە ءتوندىرۋى مۇمكىن قاۋىپ- قاتەرلەرى تۋرالى قالىڭ جۇرتشىلىققا اقپارات بەرۋ. استەرويدتار كۇنىن اتاپ ءوتۋ ءۇشىن 30-ماۋسىمنىڭ تاڭدالۋى - ادامزات تاريحىنداعى ەڭ اۋقىمدى استەرويد اپاتى - تۋنگۋسس مەتەوريتىنىڭ قۇلاعان كۇنىنە (1908 ج. ) بايلانىستى.
حالىقارالىق پارلامەنتاريزم كۇنى 2018 -جىلى ب ۇ ۇ باس اسسامبلەياسى ءوزىنىڭ قارارىندا پارلامەنتارالىق وداقتىڭ قۇرىلعانىنا ءبىر جىل تولۋىن حالىقارالىق پارلامەنتاريزم كۇنى دەپ جاريالادى، بۇل پارلامەنتتەر مەن پارلامەنتتىك ۇيىمداردىڭ ۇلتتىق دەڭگەيدەگى جانە تۇراقتى دامۋدىڭ جاھاندىق ماقساتتارىنا قول جەتكىزۋدەگى جانە بۇكىل الەمدەگى ادامداردىڭ ءومىرىن جاقسارتۋداعى ءرولىن ەرەكشە اتاپ ءوتتى.
ەستە قالار وقيعالار
1935 -جىلى ءبورلى اۋدانى قۇرىلدى. اۋداننىڭ قازىرگى اۋماعى 1965 -جىلى قالىپتاستى. باتىس قازاقستان وبلىسىنىڭ سولتۇستىك- شىعىس بولىگىندە ورنالاسقان. وبلىستىڭ ءۇش اۋدانىمەن جانە سولتۇستىكتە جايىق وزەنى بويىمەن رەسەي فەدەراتسياسىنىڭ ورىنبور وبلىسىمەن شەكتەسەدى.
اۋدان اۋماعى 5556 مىڭ شارشى مەتردى قۇرايدى. اۋدان اۋماعىنا 15 اۋىلدىق وكرۋگتەر مەن اقساي قالاسى كىرەدى. 31 ەلدى مەكەن بار، سونىڭ ىشىندە 14 اكىمشىلىك- اۋماقتىق ءبولىنىس كىرەدى: اقبۇلاق، الەكساندروۆكا، اقسۋ، ءبورلى، بۋماكول، بەرەزوۆ، جارسۋات، كەنتۇبەك، قاناي، قاراعاندى، پۋگاچيەۆ، پريۋرال، ۋسپەن اۋىلدىق وكرۋگتەرى جانە اقساي قالاسى. اۋدان ورتالىعى اقساي قالاسىندا ورنالاسقان. اۋدان ورتالىعىنان ورال قالاسىنا دەيىنگى قاشىقتىق 140 ك م. 1954 -جىلى ك س ر و مينيسترلەر كەڭەسى ماگنەتيتتى كەن تابىلعان سوكولوۆ جانە سارىباي كەن ورىندارىنىڭ نەگىزىندە سوكولوۆ- سارىباي تاۋ- كەن بايىتۋ وندىرىستىك بىرلەستىگىنىڭ قۇرىلىسىن باستاۋ تۋرالى شەشىم قابىلدادى.
1998 -جىلى قازاقستان رەسپۋبليكاسىنىڭ پرەزيدەنتى جانىنداعى شەتەلدىك ينۆەستورلار كەڭەسى قۇرىلدى. كەڭەستىڭ نەگىزگى مىندەتتەرى - قازاقستان رەسپۋبليكاسىنىڭ ۇكىمەتى مەن ەلدە جۇمىس ىستەپ جۇرگەن شەتەلدىك ينۆەستورلاردىڭ اراسىنداعى تىكەلەي ديالوگتى قامتاماسىز ەتۋ، ينۆەستيتسيالىق قىزمەتپەن بايلانىستى پروبلەمالىق ماسەلەلەردى جەدەل شەشۋ، قازاقستاندا ينۆەستيتسيالىق كليماتتى جاقسارتۋ جانە ەلىمىزدى الەمدىك ەكونوميكالىق پروتسەستەرگە ودان ءارى ينتەگراتسيالاۋ.
2007 -جىلى استانادا بەيبىتشىلىك جانە كەلىسىم سارايىنىڭ الدىندا حالىقتار دوستىعى مونۋمەنتى اشىلدى. مونۋمەنتتىڭ سالتاناتتى اشىلۋ راسىمىنە ەلباسى نۇرسۇلتان نازاربايەۆ پەن ەلىمىزگە جۇمىس ساپارىمەن كەلگەن يسپانيا كورولى حۋان كارلوس جانە كوروليەۆا سوفيا قاتىستى. اتالعان ەسكەرتكىشتىڭ اۆتورلارى - سۋرەتشى تولەۋعازى بايعاليەۆ، ساۋلەتشى ساماتبەك تاجەن ۇلى، ءمۇسىنشى اسقار نارتوۆ.
ەسكەرتكىشتىڭ بيىكتىگى - 21 مەتر. ونىڭ جوعارعى جاعىندا ەلىمىزدەگى سانى 100 مىڭنان اساتىن قازاق، ورىس، نەمىس جانە كارىس ۇلتى قىزدارىنىڭ شاڭىراقتى كوتەرىپ تۇرعان ءمۇسىنى بەينەلەنگەن. ەسكەرتكىشتىڭ ورتاسىندا قازاقستانداعى ۇلتتار مەن ۇلىستاردىڭ سانىنا سايكەس كەرەگەلەر مەن ماساق ورنالاسقان.
2009 -جىلى استاناداعى تاۋەلسىزدىك سارايى جانە «قازاق ەلى» مونۋمەنتى ورنالاسقان ماناس كوشەسىنىڭ اتى تاۋەلسىزدىك داڭعىلى دەپ وزگەرتىلدى. 2010 -جىلى قاراعاندى وبلىسىنىڭ تەمىرتاۋ قالاسىندا 1985 -جىلى سالىنعان بولاشاق ۇرپاققا جولداۋ جازىلعان كاپسۋلانى اشۋ سالتاناتى ءوتتى.
2010 -جىلى كەدەن وداعىنا مۇشە ەلدەر، قازاقستان ۇكىمەتى جانە «ازيا اۆتو» اق اۆتوموبيل قۇراستىرۋ زاۋىتى ماقۇلداعان كەلىسىمدەردىڭ نەگىزىندە قازاقستان رەسپۋبليكاسى تاريحىندا العاش رەت اۆتوموبيل قۇراستىرۋ ونەركاسىبى تۋرالى كەلىسىمگە قول قويىلدى. «ازيا اۆتو» - ونىمدەرى كەدەن وداعىنا مۇشە ەلدەردىڭ اۋماعىندا باج سالىعىنسىز تاسىمالداناتىن قازاقستاننىڭ بىردەن- ءبىر اۆتووندىرىسشىسى بولدى.
2011 -جىلى الماتىدا ۆەنگريا، اۆستريا، لاتۆيا، سلوۆاكيا جانە سلوۆەنيانىڭ بىرلەسكەن ۆيزالىق ورتالىعى اشىلدى. ماقساتى - شەنگەن ۆيزالارىن بەرەتىن ورىندى قازاقستان تۇرعىندارىنا جاقىنداتۋ.
2018 -جىلى سەمەيدەگى كورمەدە اباي ۇستاعان تۇمار دومبىرا كورسەتىلدى. دومبىرا اقىننىڭ جيدەباي قونىسىنداعى مۋزەي- ۇيىنەن ارنايى اكەلىندى. اباي قۇنانباي ۇلى ءوزىنىڭ دومبىراسىن دوسى ن. ي. دولگوپولوۆ ارقىلى 1885 -جىلى سەمەيدەگى ولكەتانۋ مۋزەيىنە تاپسىرعان. نيفونت دولگوپولوۆ سول جولى جايلاۋدان قايتقاندا، ابايدىڭ تۇمار دومبىراسىمەن قوسا قوبىز، سىبىزعى، اساتاياقتى دا مۋزەيگە تاپسىرادى. بۇگىنگى تاڭدا دومبىرا - ابايدىڭ ساۋساق ىزدەرى ساقتالعان اسا قۇندى ەكسپوناتتاردىڭ ءبىرى.
2020 -جىلى رۋمىنيا استاناسى بۋحارەست قالاسىنىڭ ەڭ كورىكتى جەرلەرىنىڭ بىرىندە «نۇر- سۇلتان» ساياباعى سالتاناتتى تۇردە اشىلدى
2020 -جىلى قازاقستاندا ۇلتتىق پاركتەردى قولداۋ قورى قۇرىلدى. ونىڭ باستى مىندەتى - وركەنيەتتى ەكوتۋريزمدى دامىتۋ جونىندەگى جوبالاردى قولداۋ، ەلدەگى ۇلتتىق پاركتەر تابيعاتىنا قامقورلىق جاساۋ ماقساتىندا مۇددەلەس ادامداردى بىرىكتىرۋ.
2020 -جىلى پولشادا اباي قۇنانباي ۇلىنىڭ 175 جىلدىعىنا ارنالعان پوشتا ماركاسى شىعارىلدى. پوشتا ماركاسىن شىعارۋ جوباسىن ۇلى اقىننىڭ مەرەيتويىن مەرەكەلەۋ اياسىندا قازاقستاننىڭ ۆارشاۆاداعى ەلشىلىگىنىڭ باستاماسىمەن «پوچتا پولسكا» ا ق جۇزەگە اسىردى.
ماركانىڭ تانىستىرىلىمى «پوچتا پولسكا» كومپانياسىنىڭ ورتالىق عيماراتىندا ءوتتى. قازاقستاننىڭ پولشاداعى ەلشىسى ءالىم قيرابايەۆ قازىرگى ۇرپاقتى ادالدىق پەن ادىلەتتىلىك قاعيدالارىن باسشىلىققا الۋعا، سونداي- اق ءوز حالقىنا قىزمەت ەتۋگە جانە ءبىلىم بەرۋگە ۇمتىلۋعا شاقىرىپ، شابىتتاندىراتىن ۇلى جازۋشىنىڭ فيلوسوفيالىق يدەيالارىنىڭ جانە ولمەس ادەبي مۇراسىنىڭ وزەكتىلىگىن اتاپ ءوتتى.
2020 -جىلى مادەني- اعارتۋ باعىتىنداعى «اباي» تەلەارناسىنىڭ تۇساۋى كەسىلدى.
