قازاقپارات كۇنتىزبەسى: 30- ناۋرىز
اتاۋلى كۇندەر
ەستە قالار وقيعالار
1992-جىلى قازاقستان رەسپۋبليكاسى مەن سينگاپۋر رەسپۋبليكاسى اراسىندا ديپلوماتيالىق قارىم-قاتىناستار ورناتىلعانى تۋرالى نوتالار الماسۋ ءراسىمى بولدى.
1993 -جىلى يتاليانىڭ «ەكوس» جۋرنالى قازاقستانعا ارنالعان سانىن شىعاردى. باسىلىم قازاق، ورىس، يتاليان، اعىلشىن تىلدەرىندە جارىق كوردى. وندا قازاقستان پرەزيدەنتى ن. نازاربايەۆتىڭ سۇحباتى بەرىلگەن.
2001 -جىلى «قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» قۇرىلدى.
قاۋىمداستىقتىڭ نەگىزگى مىندەتتەرىنىڭ ءبىرى - الەۋمەتتىك-ەكونوميكالىق ماسەلەلەردى شەشۋ ءۇشىن تۇلەكتەردىڭ كۇش-جىگەرىن، زياتكەرلىگىن، شىعارماشىلىعىن جانە ىسكەرلىك الەۋەتىن بىرىكتىرۋ، قازاقستان رەسپۋبليكاسىنىڭ ەكونوميكالىق، الۋمەتتىك جانە ساياسي پروگرەسىنە مۇمكىندىك بەرەتىن جاسامپازدىق ءىس-شارالاردى وتكىزۋ.
«بولاشاقتىقتاردىڭ» قۇقىقتارى مەن قىزىعۋشىلىقتارىن قورعاۋعا، ءبىرتۇتاس شاڭىراققا بىرىكتىرىپ ۇيىمداستىرۋدى قاۋىمداستىق وزىنە جاۋاپكەرشىلىككە الدى.
2006 -جىلى قازاقستاندا حالىقارالىق جازۋشىلار مەن پۋبليتسيستەر قاۋىمداستىعىنىڭ رەسمي وكىلدىگى اشىلدى. حالىقارالىق قاۋىمداستىقتىڭ ەلىمىزدەگى وكىلدىگى الماتىدا ورنالاستى. الەمنىڭ 35 مەملەكەتىندە 4 جىلدان بەرى تىڭعىلىقتى جۇمىستار اتقارىپ كەلە جاتقان قاۋىمداستىق ءبىزدىڭ اقىن-جازۋشىلارىمىزدى، پۋبليتسيست-جۋرناليستەرىمىزدى سول ەلدەرگە تانىتۋ ماقساتىندا جۇمىستار اتقارادى.
قاۋىمداستىقتىڭ شتاب-پاتەرى لوندوندا، ورتالىق ەۋروپا بيۋروسى پراگادا، باسپا ورتالىعى مەن باسقارما ورنى ريگادا ورنالاسقان.
2010 -جىلى يسلام كونفەرەنتسياسى ۇيىمىنىڭ جانىنان قازاقستاننىڭ تۇراقتى وكىلدىگى اشىلدى.
2011 -جىلى الماتىدا قازاقستان جانە ورتالىق ازياداعى «Tennis.kz» حالىقارالىق تەننيس اكادەمياسىنىڭ سالتاناتتى تۇردە اشىلۋى ءوتتى.
قازاقستاندىق جاڭا بۋىن تەننيسشىلەرىنە ورتالىق ازيا مەن ت م د ەلدەرىندەگى ەڭ ۇزدىك كەشەن ۇسىنىلدى. مۇندا جەتى جابىق جانە جەتى اشىق كورت، اەروبيكا، گيمناستيكا، فيتنەس-زالدارى، سپورتتىق بار، ساۋنا، اتالمىش سپورتپەن اينالىسۋعا قاجەتتى زاتتار ساتاتىن ارنايى دۇكەن، ماسساج كابينەتتەرى بار.
2011 -جىلى قازاقستان رەسپۋبليكاسىنىڭ ۇلتتىق بانكى «تۇڭعىش عارىشكەر» مونەتاسىن اينالىسقا شىعاردى. نومينالى - 500 تەڭگە. بيكولورلى (قۇراما) مونەتانىڭ ءپىشىنى شەڭبەر تارىزدەس، كونتسەنتراتسيالى تۇردە ورنالاسقان ساقينا جانە ديسكىدەن تۇرادى. مونەتانىڭ ىشكى ديسكى كۇمىستەن، سىرتقى ساقيناسى تانتالدان جاسالعان.
ماسساسى 40,7 گرام (ماسساسى 24 گرام تانتالدان ساقينا، ديسكىسى 925/1000 سىنامدى كۇمىستەن، ماسساسى 16,7 گرام) ديامەترى - 38,61م. «rroof» ساپاسىمەن جاسالعان، تارالىمى - 5 مىڭ دانا.
2012 -جىلى ش. ايمانوۆ اتىنداعى كينوستۋديا تۇسىرگەن «ءانشى بالا» فيلمى گولليۆۋدتا وتكەن International Family Film Festival اتتى حالىقارالىق فەستيۆالدە «ۇزدىك شەتەل دراماسى» اتالىمىندا سىيلىق الدى.
«ءانشى بالا» - جازدا اتا-اناسى اۋىلعا اپارعان قالالىق بالا تۋرالى حيكايا.
2013 -جىلى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسى امەريكا مەملەكەتتىك باسقارۋ قوعامىنىڭ (ASPA - American Society for Public Administration) تولىق مۇشەسى بولدى.
2017 -جىلى نورۆەگيا كورولدىگىنىڭ قازاقستانداعى قۇرمەتتى كونسۋلدىعىنىڭ اشىلۋ ءراسىمى بولدى.
2018 -جىلى برازيليا قالاسىنداعى EBC شتاب-پاتەرىندە «قازاقپارات» حالىقارالىق اقپارات اگەنتتىگى EBC مەدياحولدينگىمەن ىنتىماقتاستىق تۋرالى مەموراندۋمعا قول قويدى. مەموراندۋم قازاقستان مەن برازيليا جەتەكشى ب ا ق وكىلدەرى اراسىندا ءوزارا بايلانىستى نىعايتۋ جانە اقپارات الماسۋ، مەملەكەت باسشىلارى مەن رەسمي دەلەگاتتاردىڭ ءىس-ساپارلارىنا، باسقا دا قازاقستان رەسپۋبليكاسى مەن برازيليا فەدەراتيۆتىك رەسپۋبليكاسى اۋماعىندا وتكىزىلەتىن مەملەكەتارالىق شارالارعا اقپاراتتىق قولداۋدى قامتاماسىز ەتۋ جانە ۇيىمداستىرۋ ماقساتتارىن كوزدەيدى.
2019-جىلى 120 قازاقستاندىق اسكەري قىزمەتكەر ب ۇ ۇ- نىڭ «الەمگە قىزمەتى ءۇشىن» مەدالدارىمەن ماراپاتتالدى. ناگرادالاردى سالتاناتتى تابىستاۋ ءراسىمى ب ۇ ۇ- نىڭ ليۆانداعى بەكەتىندە ءوتتى. وعان 600 دەن استام ادام، سونىڭ ىشىندە 30 ەلدىڭ ەلشىلەرى مەن اسكەري اتتاشەلەرى، «شىعىس» سەكتورى بولىمشەلەرىنىڭ كومانديرلەرى قاتىستى.
2020 -جىلى Sportsmole.co.uk جۋرنالى الەمدىك تەننيستە تانىمال بولىپ كەلە جاتقان ون جۇلدىزدىڭ ءتىزىمىن جاسادى، وعان قازاقستاندىق تەننيسشى ەلەنا رىباكينا كىردى. بۇعان دەيىن حابارلانعانداي، رىباكينا ءوز مانسابىندا العاش رەت الەمدىك رەيتينگتىڭ توپ-20 قاتارىنا كىردى، بۇل - قازاقستاندىق تەننيسشىلەر ءۇشىن تاريحي جەتىستىك.
