نۇر-سۇلتاندا ەكى تۇرعىن 30 جىل قۇلدىقتا بولعان
فرانس سەمەردا ۋكراينادان قازاقستانعا كوشىپ كەلگەن. ۋچاسكەلىك پوليتسيا ينسپەكتورى بولىپ قىزمەت اتقارعان، كەيىن كرانشى بولعان. سەمەردانىڭ ايتۋىنشا، 1990 -جىلدارى ميليتسيا فورماسىنداعى بانديتتەر ونىڭ قۇجاتىن تارتىپ العان. تۇرعىن ولاردىڭ قولاستىندا جۇمىس ىستەۋدەن باس تارتىپتى. ال بانديتتەر ونى قۇلدىققا سالعان. ەر ادام 3 جىل قۇجاتىن قالپىنا كەلتىرمەك بولعان. الايدا ودان ناتيجە شىقپاپتى.
«ولار مەنى ەرەيمەنتاۋداعى تاۋعا اپاردى. مەن وندا 2 جىل تۇردىم، كەيىن قاشىپ كەتتىم. قوياندىدا 10 جىل، باسقا جەردە 7 جىل جۇمىس ىستەدىم. ولار مەنى الداپ، اقشا تولەگەن جوق. پوليتسيادان كومەك سۇرادىم. ولار ماعان «ءبىز سىزگە كومەكتەسە المايمىز« دەدى. كەيىن كوشە كەزىپ كەتتىم. سوعان قاراماستان مەن قازاقستاندىقپىن، ۇلتىم - قازاق»، - دەيدى سەمەردا.
ۆلاديمير ساۆرۋحيننىڭ قۇجاتسىز جۇرگەنىنە 29 جىل بولىپتى. ول 1991 -جىلى رەسەيدەن قازاقستانعا قونىس اۋدارعان. الايدا پاسپورتىن جوعالتىپ الىپتى. تۇرعىلىقتى مەكەنجايى بولماسا، ءتولقۇجاتتى رەتكە كەلتىرۋ مۇمكىن ەمەس. ەر ادام سوڭعى 10 جىلدا مالشى بولعان.
«ولار تەك سۇراۋ سالادى، ەشقانداي جەردەن جاۋاپ جوق. مەن سودان بەرى ءوتىنىش بەرگەن جوقپىن. ءقازىر قۇجاتتار تاپسىردىم، جۇمىس العا جىلجىپ كەلەدى. ەگەر قانداي دا ءبىر جۇمىس تاپقان كۇننىڭ وزىندە ءسىزدى الداپ كەتۋى مۇمكىن: اقشا جوق، ەشتەڭە تولەنبەيدى»، - دەيدى ساۆرۋحين.
قازىرگى تاڭدا «قورعاۋ استانا» قورى قۇجاتسىز قالعان ەكى تۇرعىننىڭ ماسەلەسىمەن اينالىسىپ جاتىر. قوردىڭ جەتەكشىسى اننا رىل قۇلدىقتا بولعاندار ودان ەشقاشان ءوز كۇشىمەن شىعا المايتىنىن ايتادى.
«ءبىز ولاردىڭ قۇجاتتارىن №13 فورماسىنا تاپسىردىق. ءسىز الدىمەن ازاماتتىعىن راستاۋ ءۇشىن ءوتىنىش بەرەسىز نەمەسە «ازاماتتىعى جوق« دەگەن قۇجاتتى الاسىز. كەيىن تۇرعىلىقتى مەكەن جايىن بويىنشا قۇجات الۋىڭىز كەرەك. الايدا ونى جاساۋ مۇمكىن بولماي تۇر. ءبىز ونى ءوز قورىمىزدىڭ بازاسىندا جاساپ جاتىرمىز. ولاردىڭ ايىپپۇل، باج سالىعىن تولەۋگە اقشاسى جوق. ءبىز كومەكتەسىپ جاتىرمىز. وكىنىشكە قاراي، جەكە قارجىلاندىرۋ جوبالارى جوق»، - دەيدى اننا رىل.
نۇر-سۇلتان قالاسىنىڭ پوليتسيا دەپارتامەنتى ساۆرۋحين مەن سەمەردانىڭ جەكە كۋالىكتەرىن قالپىنا كەلتىرۋ جۇمىستارى باقىلاۋدا ەكەنىن اتاپ ءوتتى.
«قازىرگى تاڭدا حمەلنيتسكي اۋدانىنىڭ جانە رەسەي فەدەراتسياسىنىڭ باستى ادىلەت باسقارماسىنا بۇل ازاماتتاردىڭ تۋۋ تۋرالى كۋالىكتەرىن الۋ تۋرالى وتىنىشتەر جىبەرىلدى» - دەدى قالالىق پوليتسيا دەپارتامەنتىنىڭ باسپا ءسوز قىزمەتى جەتەكشىسىنىڭ مىندەتىن اتقارۋشى ەلميرا شاۋلەنوۆا.
