اجەمەن نەمەرەنىڭ ايتىسى: ۇلكەن ساحناعا 30 جىلدان سوڭ قايتا شىقپاقپىن – ە. مۇقامادي قىزى
البەتتە، ايتىستىڭ الدىندا اقىنداردا تولقۋ، وي قورىتۋ، قوبالجۋ بولاتىنى ءسوزسىز. دەگەنمەن، بارلىق كورەرمەن، جانكۇيەرلەر عانا ەمەس، ايتىسكەرلەر دە اسىعا كۇتىپ وتىرعان ءسوز سايىسىنىڭ الدىندا ارداگەر اقىن، «باتىر انا» ەگەۋحان مۇقامادي قىزىنان ءبىر-ەكى اۋىز پىكىر سۇراۋعا تاۋەكەل ەتتىك. ارنايى ۋاقىت ءبولىپ، ءوز ويمەن بولىسكەنى ءۇشىن ءاز-اناعا العىس ايتا وتىرىپ، سۇحباتتىڭ ءتۇيىنىن سىزدەرگە ۇسىنامىز.
ەگەۋحان مۇقامادي قىزى:
- ايتىسقا العاش 16 جاسىمدا كەلگەن بولاتىنمىن. بۇعان بىردەن- ءبىر سەبەپشى بولعان ءوزىمنىڭ انام ەدى. ايتىسكەر اقىن عانا ەمەس، بىرنەشە جىرلاردى جاتقا ايتاتىن تالاپكەر ادام بولاتىن. جالپى، ونەرگە دەگەن تالپىنىسىمىز وتباسىمىزدىڭ ءاربىر مۇشەسىندە بار بولاتىن. اعام موڭعوليا قازاقتارىنىڭ العاشقى رومانىن جازعان، جالپى ونعا جۋىق روماندار جازعان جازۋشى، اۋدارماشى، قازاقستان جازۋشىلار وداعىنىڭ، موڭعوليا جازۋشىلار وداعىنىڭ مۇشەسى بولعان. مەن ءوزىم دە موڭعوليا جازۋشىلار وداعىنىڭ مۇشەسى، جۋرناليستەر وداعىنىڭ مۇشەسى، ەڭبەك ارداگەرى اتانعانمىن. ءبىزدىڭ وتباسىنىڭ ءاربىر مۇشەسىندە اقىندىق بار. تامارا دەگەن ەڭ ۇلكەن قىزىم جازبا اقىن. بەدەلحان دەگەن بالام دا ايتىسقان. ەسەنگۇل دەگەن جۋرناليست قىزىم ونەر جولىن وسى ايتىستان باستاعان.
ەڭ نەگىزگىسى، وسى ايتىستى تۋ ەتىپ، جازبا ولەڭمەن قاتار الىپ كەلە جاتقان داۋلەتكەرەي دەگەن كىشى بالامىز. وعان نەمەرەمىز ارداكەرەي دە ىلەسىپ جۇرگەن جايى بار. ەرتەڭگى ايتىسقا وسى نەمەرەم ارداكەرەيمەن شىققالى تۇرعانىما اللاعا مىڭ دا ءبىر شۇكىر! بۇرىن-سوڭدى بولماعان دۇنيە عوي جالپى…
اتامەكەن تورىندە العاش الماتىداعى «رەسپۋبليكا سارايىندا» 1989 -جىلى حالىقارالىق ايتىسقا شىققان بولاتىنمىن. سودان بەرى تۋرا 30 جىلدان سوڭ، دال وسى «رەسپۋبليكا سارايىندا» شىققالى وتىرمىن. سول كەزدەگى ءبىزدى قابىلداپ، ايتىسقا شىعارعان ءجۇرسىن باۋىرىمىز ەدى. ءالى كۇنگە دەيىن ايتىستى قاجىماي، تالماي جۇرگىزىپ كەلە جاتقانىنا وتە ريزامىن.
ايتىستى جانىمەن، جۇرەگىمەن سۇيەتىن ادام دەپ تانيمىن. قازاقتىڭ ۇلكەن ءتول ونەرىن دارىپتەپ، ودان ءارى دامىتىپ، 30 جىلدان بولەك، بۇرىننان باستاپ قولعا الىپ، ساحنادان تۇسىرمەي كەلە جاتقانى ءۇشىن وعان مىڭ دا ءبىر راقمەتىمدى ايتامىن. ايتىس ءار قىرىنان، ار تۇرىنەن تانىلىپ جاتىر. مۇنىڭ ءبارى حالىقتىڭ قىزۋعىشىلىعىن ارتتىرۋ ءۇشىن جاسالىپ جاتقان جۇمىستار دەپ بىلەمىز. قولداپ جاتقان «NurOtan» پارتياسىنداعى ازاماتتارعا دا راحمەت! تاربيە وتباسىنان باستالادى، قۇس ۇيادا نەنى كورسە، ۇشقاندا سونى ىلەدى. قانشاما وتباسىنان وسىنداي اقىندار شىعىپ جاتقانى بارشامىزدى قۋانتادى.
قاجىماي، تالماي ايتىسىپ جۇرە بەرگىم كەلەدى. وسى ايتىسقا قالدىرماي، قۇرمەتتەپ شاقىرىپ وتىرعان ازاماتتارعا، حالقىما العىسىم شەكسىز!
حوش، اقىن انانىڭ اقجارما تىلەگى وسى. نەمەرەسى نە دەيدى؟ اجەسى العاش رەت «رەسپۋبليكا سارايىنا» شىققاندا ءالى ومىرگە كەلمەگەن كاپ ارداكەرەي بەدەلحان ۇلىنىڭ پىكىرىن بىلدىك.
كاپ ارداكەرەي بەدەلحان ۇلى:
- ايتىس - قازاقتىڭ ەڭ ۇلكەن ءتول ونەرى. ار قازاقتىڭ قانىنا سىڭگەن قاسيەتتى قارا ولەڭ ءبىزدىڭ وتباسىمىزعا دا دارىعان. اتامىز بەن انامىز (اجەمىز) ۇلكەن ايتىسكەر اقىن بولعان، الدىمدا داۋلەتكەرەيدەي اعام بار، وسى كىسىلەرگە قاراپ بوي تۇزەپ، ىزىنەن ەرىپ كەلە جاتقان جاس اقىن رەتىندە، قارا شاڭىراعىمىزدا قالىپتاسقان ءداستۇردى ولتىرمەي، جانداندىرۋ ماقساتىندا مەن دە ونەرىمدى حالىققا پاش ەتكىم كەلەدى!
تاريحتا اجە مەن نەمەرەنىڭ ايتىسى بۇرىن-سوڭدى بولماعان شىعار، بولسا دا بۇگىنگى كۇنگە جەتپەگەن دەۋگە بولادى. اجە مەن نەمەرەنىڭ اراسىنداعى سىيلاستىققا، ىزگى-ونەگەگە تولى ايتىس جاساۋعا تىرىسامىن!
مىنە، نەمەرەسىن ءسابي كۇنىندە بەسىك جىرىمەن سۋسىنداتقان اجە ەرتەڭ سول بالامەن ولەڭ تىلىندە سايىسپاق. اتانىڭ قانى، انانىڭ سۇتىمەن دارىعان ونەردە شەك بولمايدى. 30 -قىركۇيەك كۇنى الماتىداعى «رەسپۋبليكا سارايىندا» وتەتىن ايتىس - وسىنىڭ ايعاعى. اجەلى- نەمەرەلى اقىندارعا ساتتىلىك تىلەيمىز!
ەستەرىڭىزگە سالا كەتەيىك، قىركۇيەك ايىنىڭ 30 -جۇلدىزىندا «NurOtan» پارتياسىنىڭ قولداۋىمەن، الماتى قالاسى اكىمدىگى جانە «ايتىس اقىندارى مەن جىرشى، تەرمەشىلەردىڭ حالىقارالىق وداعى» ر ق ب ۇيىمداستىرۋىمەن «وتان وتباسىنان باستالادى» اتتى اقىندار ايتىسى وتەدى.
وتەتىن ورىنى: رەسپۋبليكا سارايى
باستالۋى 19:00-دە.
بيلەتتەر الماتى قالاسىنىڭ بارلىق كاسسالارىندا ساتىلۋدا.
aitysker.org
