قازاقستاندا ۆ ي چ ىندەتىن جۇقتىرعان 30 مىڭعا جۋىق ادام تىركەۋدە تۇر
رەسمي ستاتيستيكاعا سۇيەنسەك، قازاقستاندا ۆ ي چ ىندەتىن جۇقتىرعان 30 مىڭعا جۋىق ادام تىركەۋدە تۇر.
الماتى قالاسىندا وسى دياگنوزبەن ءومىر ءسۇرىپ جاتقاندار سانى 5 مىڭعا جۋىقتايدى. بۇل تۋرالى قازاقپارات مەديتسينالىق ساقتاندىرۋ قورىنىڭ باسپا ءسوز قىزمەتىنە سىلتەمە جاساپ حابارلايدى.
«جۇرتشىلىق اراسىندا ۆ ي چ سەكس-يندۋستريا قىزمەتكەرلەرى، گوموسەكسۋاليستەر نەمەسە ناشاقورلاردىڭ اۋرۋى دەگەن جاڭساق پىكىر قالىپتاسقان. سەبەبى، ۆيرۋس ادام اعزاسىنا قان مەن شاۋەت ارقىلى، انا ءسۇتى ارقىلى دا تارالۋى مۇمكىن. ول ءبىر ءشپريتستى پايدالانعاندا، جىنىستىق قاتىناس كەزىندە نەمەسە بوسانعان كەزدە انادان بالاعا جۇعادى. ونى مەديتسينا قۇرالدارى دۇرىس زارارسىزداندىرىلماعان جاعدايدا اۋرۋحانالاردا جۇقتىرۋ قاۋپى دە جوق ەمەس. ءبىراق ۆ ي چ جۇقتىرعان ناۋقاسپەن ءبىر ستاقاننان سۋ ىشكەننەن، ءبىر سۇلگى پايدالانعاننان نەمەسە سۇيىسكەن كەزدە اۋرۋ جۇقپايدى. سونداي-اق، ينفەكسيا سىلەكەي ارقىلى نەمەسە اۋا ارقىلى تارالمايدى» دەلىنگەن باسپا ءسوز بايانىندا.
رەسپۋبليكالىق سپيد-كە قارسى كۇرەس ورتالىعىنىڭ مالىمەتىنشە، وتكەن جىلى ەلىمىز بويىنشا 2865 ادام ۆيرۋس جۇقتىرعان. ونىڭ 1700-دەن استامى - ەر ادامدار، مىڭنان استامى - ايەلدەر. 62 پايىزى گەتەروسەكسۋالدىق قاتىناس سالدارىنان بولعان. سىرقاتقا شالدىققانداردىڭ باسىم بولىگى - 30 بەن 49 جاس ارالىعىنداعىلار.
«بۇل اۋرۋ ءار كەزەڭدە ءارتۇرلى سيمپتومدارعا يە. ۆيرۋس جۇقتىرعاننان كەيىن العاشقى 2-4 اپتادا ناۋقاستاردىڭ 40-90 پايىزى وزدەرىن سۋىق تيگەندەي سەزىنەدى. دەنەسى دەل- سال بولىپ، تاماعى اۋىرادى، توڭىپ، ءۇستى قىشيدى، اۋىز قۋىسىندا جارا پايدا بولىپ، ليمفا بەزدەرى ۇلعايادى. تەستەردىڭ ءبارى بولماسا دا، كوپشىلىگى ۆيرۋس ارقىلى بولىنەتىن انتيدەنەلەردى انىقتاي الادى. دەگەنمەن، ءار جارتى جىلدا نەمەسە جىلىنا ءبىر رەت ۆ ي چ-كە تەست تاپسىرۋدى ادەتكە اينالدىرعان ءجون. ونىڭ ۇستىنە، قازاقستاندىقتار تەكسەرۋدىڭ بۇل تۇرىنەن تۇرعىلىقتى ەمحاناسى ارقىلى تەگىن وتە الادى»، - دەيدى مەديتسينالىق ساقتاندىرۋ قورىنىڭ الماتى فيليالى ديرەكتورى تىلەۋحان ابىلدايەۆ.
مامانداردىڭ ايتۋىنشا، يممۋن تاپشىلىعى ۆيرۋسىن ەمدەۋگە بولادى. ءبىراق ودان تولىق ايىعىپ كەتۋ مۇمكىن ەمەس. رەتروۆيرۋسقا قارسى كۇشەيتىلگەن تەراپيانىڭ ارقاسىندا ۆيرۋس جۇقتىرعان پاتسيەنتتەردىڭ ءومىرىن 70-80 جاسقا دەيىن ۇزارتۋعا بولادى، دەيدى مامان.
«ۆيرۋس انىقتالعان جاعدايدا ناۋقاس ەڭ الدىمەن سپيد ورتالىعىنا بارىپ تىركەلۋى ءتيىس. ويتكەنى، اۋرۋدى باقىلاۋدا ۇستاۋدىڭ ماڭىزى وتە زور. ەسەپتە تۇرعان ازاماتتار كەپىلدەندىرىلگەن تەگىن مەديتسينالىق كومەك شەڭبەرىندە رەتروۆيرۋسقا قارسى ەمدى تەگىن الا الادى. دەر كەزىندە ەمدەلمەسە يممۋن تاپشىلىعى ۆيرۋسى سپيد-كە اينالىپ كەتەدى»، - دەيدى ت. ابىلدايەۆ.
ايتۋىنشا، ەسەپتە تۇرعان ازاماتتار رەتروۆيرۋسقا قارسى ەمدى تەگىن الا الادى. ۆ ي چ جۇقتىرعان انالاردىڭ بالالارىنا ارنالعان تاعامدار مەن ءدارى-دارمەك تەگىن بەرىلەدى.