استانادا 30 كيىز ۇيدەن قۇرالعان «ەتنواۋىل» اشىلادى

استانا. قازاقپارات - 1 -ماۋسىم كۇنى استانانىڭ 20 جىلدىعىنا ارنايى قۇرىلعان «ەتنواۋىل» ۇلتتىق- مادەني كەشەنىنىڭ ەكىنشى ماۋسىمى اشىلادى جانە ول جازدىڭ سوڭىنا دەيىن جۇمىسىن جالعاستىرادى، دەپ حابارلايدى قازاقپارات ءتىلشىسى.

ق ر مادەنيەت جانە سپورت مينيسترلىگىنەن حابارلاعانداي، اۋقىمدى وقيعا قازاق مادەنيەتى مەن تاريحىنىڭ كوپ عاسىرلىق جاۋھارىن جيناقتاعان. ەتنواۋىلدى ءوز سالاسىنداعى ايرىقشا جانە العاشقى ۇلتتىق جوبا دەپ ماقتانىشپەن ايتۋعا بولادى. كەشەننىڭ قاقپاسىنا كىرە بەرگەننەن قوناقتاردى باتىر كوشپەندىلەردىڭ، شەكسىز سار دالانى باعىندىرۋشىلاردىڭ ەجەلگى زامانىنا قاس قاعىم ساتتە الىپ بارادى. استانانىڭ مەرەيتويىن اتاپ وتۋگە كەلگەن ءار ادام ءوزى ءۇشىن قىزىقتى جانە ەستە قالارلىق وقيعانى كورۋىنە مۇمكىندىك الادى.

ەتنواۋىل اياسىندا ەتنيكالىق مۋزىكا جانە تەاتر ونەرىنىڭ فەستيۆالدەرى، كورمەلەر، قولدانبالى- ساندىك ونەرىنىڭ ءارتۇرلى شەبەرلىك سىنىپتارى، ۇلتتىق سپورت تۇرلەرى بويىنشا سايىستار، اتتى- سپورتتىق ءىس-شارالار وتەدى.

2,5 مىڭ شارشى مەتر الاڭىنا جايىلعان ايماق «شەبەرلەر اۋىلى»، «سپورتتىق- تسيركتىك ءىس- شارالار»، «كونسەرتتىك زال»، «دەمالىس اللەياسى»، «ءداستۇرلى قازاق جانە شىعىس تاعامدارى مەيرامحاناسى»، «ۇلتتىق داستۇرلەر مەن سالتتار»، «جىبەك جولى» شىعىس بازارى جانە «اڭشىلىقتىڭ ءداستۇرلى تۇرلەرى» سەكىلدى كوپتەگەن سەكتورلارعا بولىنگەن.

ەتنواۋىل اياسىنداعى ەڭ اۋقىمدى وقيعا قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن «الپامىستىڭ جارقىن جەبەسى» اتتى تەاترلاندىرىلعان سيركتىك شوۋى بولادى.

قويىلىمعا ءار ەلدەن كەلگەن 70 ارتيست قاتىسادى. ولار: حالىقارالىق سيركتىك كونكۋرستارىنىڭ لاۋرەاتتارى جانە ەڭ جوعارى دەڭگەيدەگى سپورتتىق سايىستاردىڭ جەڭىمپازدارى، Du Soleil سيركىنىڭ كوپ جىلدار بويى قاتىسۋشىلارى.

«ەتنواۋىل» استانا قالاسىنان 14 شاقىرىم جەردەگى «قازانات» اتشابارىنىڭ اۋماعىندا ورنالاسقان.