اۋعانستانداعى سوعىستا 30 جىل بۇرىن جوعالىپ كەتكەن ك س ر و ساربازى ءتىرى تابىلدى

استانا. قازاقپارات - اۋعانستانداعى سوعىس كەزىندە تۇتقىنعا ءتۇسىپ، كەيىن ءىز- ءتۇسسىز جوعالىپ كەتكەن بۇرىنعى كەڭەس اسكەرىنىڭ پراپورشيگى امان- ەسەن تابىلدى.

 بۇل تۋرالى ۋكراينالىق ت س ن پورتالى حابارلاپ وتىر.

وسى ۋاقىت ارالىعىندا ەر ازامات ءوزىنىڭ ەسىمىن دە، ۋكراين ءتىلىن دە، ورىس ءتىلىن دە ۇمىتىپ قالىپتى. گەوفيزيك عالىمدارمەن بۇرىنعى سارباز ءتىلماش ارقىلى سويلەسكەن. ول ءوزىنىڭ ۋكراينانىڭ ۆولىن وبلىسىنان ەكەنىن ايتىپتى.

انىقتالعانداي، يگور بەلوكۋروۆ 30 جىل بۇرىن كانداگار پروۆينتسياسىندا بورىشىن وتەپ ءجۇرىپ، تۇتقىنعا ءتۇسىپ قالعان ەكەن. ءبىراز ۋاقىت ول قۇلدىقتا بولعان. كەيىن ول امان قالۋ ءۇشىن يسلام ءدىنىن قابىلداپ، ەسىمىن امريددين دەپ وزگەرتكەن.

ونىڭ اناسى انتونينا ۇلىن 20 جىل بويى ىزدەپتى. اقىرى تاپپاعان سوڭ ول يگورعا ارناپ مولا تۇرعىزىپ، كوكتاس تا قويعان. ال، ارادا 30 جىل وتكەننەن كەيىن قارت اجەيگە ۇلىنىڭ سۋرەتىن كورسەتكەندە ول ەسىنەن تانىپ قالا جازدادى.

«جۇرەگىم بىردەن سەزدى، تانىدىم. 30 جىل وتسە دە ول وزگەرمەپتى، قارتايىپ كەتكەن. و قۇداي، قاتتى ازاپتانعان عوي»، - دەدى انتونينا اجەي ۇلىنىڭ سۋرەتىن كورىپ. ول جاقىن كۇندەرى يگوردى قۇشاعىنا الاتىنىنا سەنىمدى. ەگەر دەنساۋلىعى سىر بەرمەگەندە اۋعانستانعا ءوزىم بارار ەدىم دەپ وتىر.

ۆولىن وبلىستىق اۋعان ارداگەرلەر كەڭەسىنىڭ ءتوراعاسى يگور بەلوكۋروۆتى ەلگە 1 ايدان كەيىن اكەلۋگە ۋادە بەردى. قازىر قۇجاتتاردى راسىمدەۋ جۇمىستارى ءجۇرىپ جاتىر ەكەن.

http://studentmedia.kz