تارازدا 30 مەترلىك «قازاق حاندىعى» مونۋمەنتىنىڭ قالا سيمۆولىنا اينالار ءساتى تاياپ قالدى - فوتو

تاراز. قازاقپارات - تارازدا «قازاق حاندىعىنىڭ 550 جىلدىعى» مەرەيتويلىق شاراسى اياسىندا ەلباسىنىڭ قاتىسۋىمەن اشىلاتىن اسا بيىك مونۋمەنتتىڭ قۇرىلىسى اياقتالىپ كەلەدى، دەپ حابارلايدى، جامبىل وبلىسى اكىمىنىڭ باسپا ءسوز قىزمەتى.

30 مەترلىك مونۋمەنت قالانىڭ باتىس بولىگىندە «تاراز-ارەنا» سپورت سارايىنا قاراما-قارسى ورنالاسقان.

مونۋمەنت اۋماعى 3,5 گەكتار، بۇل جەردە سكۆەر جانە كولىك تۇراعى بولادى.

بۇگىنگى تاڭدا مونۋمەنتتى جانە ونىڭ ماڭايىن اباتتاندىرۋ جۇمىستارىنىڭ 90 پايىزى اياقتالدى.

قۇرىلىستى «جامبىل حيمستروي-ينجەنيرينگ» ج ش س جۇرگىزۋدە. سونداي-اق ەسكەرتكىشتىڭ ءوزىن جاساۋ جانە ورناتۋ ءۇشىن «ارت-سيستەم» ج ش س- مەن 350 ميلليون تەڭگەگە كەلىسىم جاسالدى. اۋماقتى اباتتاندىرۋ جانە كولىك قوياتىن جۇمىستار قۇنى - 177 ميلليون تەڭگە.

قۇرىلىستى 2015-جىلدىڭ 1- قازانىندا تولىق ءبىتىرۋ كوزدەلىپ وتىر. مونۋمەنتتىڭ سالتاناتتى اشىلۋى 9- قازاندا، قازاق حاندىعىن تويلاۋدىڭ ەكىنشى كۇنىندە بولادى.

ايتا كەتەر جايت، تاراز قالاسىنداعى قۇرىلىس پەن اباتتاندىرۋ جۇمىستارىنا قازاقستاننىڭ بارلىق وڭىرلەرى جۇمىلدىرىلدى.