پاۋەرليفتينگتەن الماتىدا وتەتىن ازيا بىرىنشىلىگىنە 30 ەلدىڭ سپورتشىلار قاتىسادى
وعان 30 ەلدەن 200 دەن استام سپورتشىلار قاتىسادى. بۇل تۋرالى بۇگىن الماتىدا وتكەن باسپا ءسوز ماسليحاتىندا ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ ءمالىم ەتتى.
«قازاقستانعا الەمنىڭ ەڭ مىقتى دەگەن سپورتشىلارى جينالادى. ولار 2016-جىلى برازيليانىڭ ريو-دە-جانەيرو قالاسىندا وتەتىن جازعى وليمپيادا ويىندارىنا جولداما الۋ ءۇشىن كۇش سىناسادى. پاۋەرليفتينگكە قاتىستى مۇنداي جوعارى دەڭگەيدەگى جارىس قازاقستاندا تۇڭعىش رەت ۇيىمداستىرىلىپ وتىر»، - دەدى ە. قاناعاتوۆ.
ونىڭ ايتۋىنشا، سوڭعى جىلدارى قازاقستاندا پاراليمپيادالىق قوزعالىس جاندانىپ كەلەدى. جانە مەملەكەت تاراپىنان بارلىق قاجەتتى كومەك كورسەتىلىپ جاتىر.
«ءبىز اشىق ازيا چەمپيوناتىنىڭ جوعارى دەڭگەيدە وتكىزۋ ءۇشىن قولدان كەلگەننىڭ بارلىعىن جاسايمىز. قازاقستان اتىنان بۇل جارىسقا 20 سپورتشى قاتىسادى. سولاردىڭ كەم دەگەندە بەسەۋى جۇلدەلى ورىنعا ىلىگەدى دەگەن ۇمىتتەمىز»، - دەدى ول.
ايتا كەتەلىك، حالىق اراسىندا پاۋەرليفتينگتى كەيدە كۇشتىك ءۇش سايىس دەپ اتايدى. ويتكەنى، مۇندا نەگىزىنەن ءۇش جاتتىعۋ بويىنشا جارىس بولادى. ولار: زىلتەمىردى يىققا قويىپ (جاۋىرىننىڭ ۇستىڭگى جاعى) جۇرەلەپ وتىرىپ تۇرۋ، شالقالاپ جاتىپ زىلتەمىردى سىعىمداپ ەكى قولمەن كوتەرۋ جانە بەلدى، قولدى ءتۇزۋ ۇستاپ، تىزەنى بۇگىپ-جازىپ، زىلتەمىردى سىعىمداپ ۇستاپ جەردەن كوتەرۋ.
