08:03, 02 - ناۋرىز 2022 | GMT +6
300 ميلليون تەڭگە: شىمكەنت تۇرعىندارى الماعان تاۋارى ءۇشىن نەسيە تولەۋگە ءماجبۇر بولعان
شىمكەنت. قازاقپارات - شىمكەنتتە الاياقتىقپەن اينالىسىپ جۇرگەن قىلمىستىق توپ ۇستالدى، دەپ حابارلايدى قازاقپارات ءتىلشىسى.
پوليسيا دەپارتامەنتىنىڭ قىزمەتكەرلەرى 250 دەن استام ازاماتتى الدادى دەگەن كۇدىكپەن 5 تۇرعىننىڭ قولىنا كىسەن سالدى. ونىڭ بارلىعى تۇركىستان وبلىسىنىڭ جەرگىلىكتى تۇرعىندارى بولىپ شىقتى. جالپى 300 ميلليوننان تەڭگەدەن استام شىعىن كەلگەن.
«قىلمىستىق توپ بەلگىلەنگەن سحەما بويىنشا جۇمىس ىستەگەن. ولار جەرگىلىكتى ازاماتتاردىڭ سەنىمىنە كىرىپ، ءىرى ساۋدا ۇيلەرى ارقىلى قايتارىمسىز قارجى شىعارىپ بەرۋگە ۋادە ەتكەن. سول ارقىلى، ولاردىڭ جەكە مالىمەتتەرى مەن قولتاڭباسىن يەلەنگەن جانە ولاردىڭ اتىنان مۇلىكتىك نەسيە العان. ناتيجەسىندە تۇرعىندار الماعان تاۋارلارى ءۇشىن نەسيە تولەۋگە ءماجبۇر بولعان»- دەلىنگەن پوليتسيا دەپارتامەنتىنىڭ باسپا ءسوز قىزمەتى تاراتقان حابارلامادا.
قازىر كۇدىكتىلەر قاماۋعا الىندى. سوتقا دەيىنگى تەرگەپ- تەكسەرۋ امالدارى ءجۇرىپ جاتىر.