چەحيادا قاتتى قۇيىن سوعىپ، 300 گە جۋىق ادام زارداپ شەكتى

نۇر- سۇلتان. قازاقپارات - چەحيانىڭ وڭتۇستىك- شىعىسىندا سلوۆاكيا مەن اۆستريانىڭ شەكاراسىنا جاقىن جەردە قاتتى تورنادو بولىپ، بىرنەشە ەلدى مەكەندەگى ۇيلەر قيراپ قالدى.

تابيعي اپاتتان كەم دەگەندە 300 گە جۋىق ادام زارداپ شەكتى، دەپ حابارلايدى قازاقپارات BBC- گە سىلتەمە جاساپ.

وقيعا بولعان اۋماقتا قۇتقارۋشىلار زارداپ شەككەندەرگە شۇعىل كومەك كورسەتىپ، ۇيىندىلەر اسىنان ادامداردى ىزدەستىرۋدە. زارداپ شەككەن اۋدانداردا توتەنشە جاعداي جاريالاندى.

«267-322 ك م/ساع. جىلدامدىقپەن سوققان جەل چەحيانىڭ گودونين قالاسىنىڭ ءبىر بولىگى مەن جاقىن ماڭداعى اۋىلدار - لۋجيتسە، گرۋشكي، موراۆسكا نوۆا ۆەس جانە ميكۋلچيتسەندى قيراتقان. وكىنىشكە وراي، قۇرباندار بار ەكەنىن راستايمىز، الايدا ولاردىڭ ناقتى سانىن اتاي المايمىن»، - دەدى جۋرناليستەرگە جەدەل جاردەم قىزمەتىنىڭ وكىلى گەدۆيك كروپاچكوۆ.

چەحيانىڭ ءى ءى م مەن دەنساۋلىق ساقتاۋ مينيسترلىگىنىڭ دەرەكتەرىنە قاراعاندا، 300 گە جۋىق ادام زارداپ شەككەن. جەلىدە تاراعان اقپاراتتارعا قاراعاندا، كەيبىر اۋىل ۇيلەرىنىڭ شاتىرى ۇشقان، جەل اۆتوكولىكتەردى اۋدارىپ، اعاشتاردى تامىرىمەن جۇلىپ اكەتكەن. عيماراتتارعا 10 سانتيمەترلىك بۇرشاق جاۋعان. چەحيادا بارلىعى 120 مىڭ ءۇي ەلەكتر جارىقسىز قالعان.