قوستانايدا 300 گە جۋىق دارىگەر جەتىسپەيدى

قوستاناي. قازاقپارات - قوستاناي وبلىسىنىڭ اۋىلدارىندا امبەباپ دارىگەرلەر جەتىسپەيدى، ال قالالاردا سالالىق ماماندار تاپشى. بۇل تۋرالى قازاقپارات تىلشىسىنە وبلىستىق دەنساۋلىق ساقتاۋ باسقارماسىنىڭ باسشىسى ەركىن داۋىتبايەۆ ايتتى.

بىلتىر توبىل- تورعاي وڭىرىنە 105 جاس مامان جانە 16 تاجىريبەلى دارىگەر كەلگەن. ولاردىڭ اراسىندا ونكولوگتار، بالا دارىگەرلەرى، تەراپيەۆت جانە حيرۋرگيا سالاسىنىڭ ماماندارى بار. ءبىراق، بۇل وبلىستاعى كادر ماسەلەسىن تولىق شەشە المادى.

«جەرگىلىكتى بيلىك قالادا جۇمىس ىستەۋگە كەلگەن جاس ماماندارعا 500 مىڭ تەڭگەدەن، اۋىلدىق جەرلەرگە ات باسىن بۇرعىسى كەلگەندەرگە 2,5 ميلليون تەڭگەگە دەيىن كوتەرمە اقى ۇسىنادى. ونىڭ سىرتىندا، ولار ەڭبەكاقىسىنا قوسىمشا ىنتالاندىرۋ كومپونەنتتەرىنە يە بولادى. الايدا، وسىنداي مۇمكىندىكتەرگە قاراماستان، مەديتسينا كادرلارىنىڭ جەتىسپەۋشىلىگى ءالى سەزىلەدى. قالالار سالالىق ماماندار قاتارىن تولىقتىرا الماي وتىرسا، اۋىلدارعا ءبىرىنشى كەزەكتە تەراپيەۆتىلەر جانە امبەباپ دارىگەرلەر قاجەت» ، - دەيدى داۋىتبايەۆ.

باسقارماسىنىڭ باسشىسىنىڭ ايتۋىنشا، دارىگەرلەر تاپشىلىعىن جويۋ ءۇشىن جۇيەلى جۇمىستار جۇرگىزىلۋدە. مىسالى، جاس مامانداردى تارتۋ ماقساتىندا باتىس قازاقستاننىڭ مەديتسينالىق ۋنيۆەرسيتەتىمەن كەلىسىم جاسالعان. بۇعان قوسا مەملەكەتتىك- جەكەشەلىك ارىپتەستىك اياسىندا رۋدنىي جانە زاتوبول كەنتىندە 250 ورىنعا شاقتالعان ەمحانا سالۋ جوسپارلانعان.

 «ءبىز جەرگىلىكتى بيۋدجەت ەسەبىنەن 100 دارىگەردى سالالىق ماماندىقتار بويىنشا وقىتا الامىز. مۇنان سوڭ ولار قوستاناي ايماقتارىندا بەس جىل جۇمىس ىستەيدى. ءبىز قازىر رەزيدەنتتەرگە 80 گرانت بولەمىز جانە دارىگەر ماماندىعىن تاڭداعان جاستارعا تاعى 20 گرانت ۇلەستىرىلەدى. ولاردىڭ ۋنيۆەرسيتەتتەگى وقۋلارىنىڭ اقىسىن تولەيمىز» ، - دەدى باسقارما باسشىسى.

باسقارما اقپاراتىنا سۇيەنسەك، وبلىستا بارلىعى 300 گە جۋىق دارىگەر جەتىسپەيدى. سونىڭ كەسىرىنەن تۋبەركۋلەز، انا مەن بالا ءولىمى، قان اينالۋ جۇيەسى، قاتەرلى ىسىك اۋرۋلار بويىنشا قوستاناي وبلىسى ءتاۋىر كورسەتكىشكە قول جەتكىزە الماي كەلەدى.

 

اۆتور: قاسقىرباي قويشىمانوۆ