بەدەلدى حيرۋرگ 300 گە جۋىق بالانىڭ جۇرەگىنە وپەراتسيا جاساعان
ويتكەنى ۇلتتىق عىلىمي كارديوحيرۋرگيالىق ورتالىقتاعى 300 بالانىڭ جۇرەگىنە وپەراتسيا جاساعانداردىڭ ءبىرى وسى كىسى. باسى- قاسىندا بولىپ، بۇلدىرشىندەرگە ءومىر سىيلادى. 3 جاسار ەكاتەرينا رەشەتنيكوۆا كوزىن اشقالى جۇرەك دەرتىمەن ارپالىسىپ كەلەدى.
وسى ۋاقىتقا دەيىن وپەراتسيا جاساۋعا ەرتە دەپ كەلگەن دارىگەرلەر بۇل جاۋاپتى ءىستى جاقىندا عانا قولعا الدى. كۆوتا بويىنشا ۇلتتىق عىلىمي كارديوحيرۋرگيالىق ورتالىعىنا جىبەرىلگەن بۇلدىرشىنگە بىلىكتى حيرۋرگ الەكساندر ميشين وپەراتسيا جاسادى. قىزدىڭ اناسى «بۇل پروتسەدۋرا ءساتتى ءوتتى»، - دەيدى.
يننا رەشەتنيكوۆا، ناۋقاس بالانىڭ اناسى:
- قىزىم تۋعاندا 3 كۇننەن كەيىن بىزگە تۋا بىتكەن جۇرەك اۋرۋى دەگەن دياگنوز قويىلدى. 3 جىل بويى تەكسەرىستەردەن ءوتىپ تۇردىق. باسىندا جۇرەكتەگى اقاۋ قىزىمنىڭ دامۋىنا ەش كەدەرگى كەلتىرگەن جوق. ۇنەمى دارىگەرلەردىڭ قاراۋىندا بولدىق. ءبىراق بالام ءسال وسكەن سوڭ وپەراتسيا جاساۋ قاجەتتىلىگى تۋدى. ويتكەنى ەسەيگەندە، بۇل كاتيانىڭ ومىرىنە ۇلكەن قاتەر ءتوندىرۋى مۇمكىن. وپەراتسيا ءساتتى اياقتالدى. 1 كۇن رەانيماتسيادا جاتتىق.
ەكاتەريناعا وپەراتسيا جاسالعالى 1 اپتا ۋاقىت ءوتتى. قازىر ول ءوزىن جاقسى سەزىنىپ ءجۇر. وڭالتۋ ۋاقىتى دا ۇزاققا سوزىلمايدى. سەبەبى ءبۇلدىرشىننىڭ جۇرەگىنە جاسالعان وپەراتسيا زاماناۋي تاسىلمەن ورىندالدى.
الەكساندر ميشين، «ۇلتتىق عىلىمي مەديتسينالىق ورتالىق» ا ق بالالار كارديوحيرۋرگياسى ءبولىمىنىڭ اعا ورديناتورى:
- بۇل گيبريدتى وپەراتسيانىڭ جاڭا ءتۇرى بولىپ تابىلادى. ءبىز ونى ورىنداۋ كەزىندە جاساندى قان اينالىمىن قوسپايمىز، كەۋدەنى بارىنشا از كەسەمىز. ول ءۇشىن جۇرەككە ارنايى قۇرىلعىلار ارقىلى جەتىپ، ونىڭ جوعارى جاعىنان ءوتىپ اقاۋدى جابامىز. ياعني جەڭىلدىكتەر وتە كوپ. وڭالتۋ كەزەڭى 3-4 كۇندى قۇرايدى. بۇرىن ءبىز مۇنداي وپەراتسيالاردى جاسامايتىنبىز. بەيجىڭ قالاسىنان كەلگەن ماماندار بىزگە وسى ءتاسىلدى ۇيرەتتى.
الەكساندر ميشيننىڭ كارديوحيرۋرگيامەن اينالىسقانىنا 10 جىلدىڭ ءجۇزى بولدى. ول ۇلتتىق عىلىمي مەديتسينالىق ورتالىق قابىرعاسىندا كۇنىنە 2-3 وپەراتسيا جاسايدى. ناۋقاستاردىڭ كوبى جۇرەك اقاۋىمەن تۋىلعان جاندار. سوندىقتان دارىگەر جۇكتى ايەلدەرگە دەنساۋلىعىنا ەرەكشە كۇتىم جاساۋدى قاتاڭ ەسكەرتەدى.
الەكساندر ميشين، «ۇلتتىق عىلىمي مەديتسينالىق ورتالىق» ا ق بالالار كارديوحيرۋرگياسى ءبولىمىنىڭ اعا ورديناتورى:
- تۋا بىتكەن جۇرەك اۋرۋى دامۋىنا اسەر ەتەتىن فاكتورلار - جۇكتىلىك كەزىندە ءدارى- دارمەكتىڭ قولدانىلۋى، اناسىنىڭ اۋرۋى، ياعني انا جۇكتىلىك كەزىندە اۋىرسا، سابيدە تۋا بىتكەن جۇرەك اۋرۋى دامۋى مۇمكىن، تۇقىم قۋالايتىن فاكتورلارمەن قاتار قورشاعان ورتا دا جۇرەك اۋرۋىنىڭ قالىپتاسۋىنا اسەر ەتەدى. سوندىقتان جۇكتى نازىكجاندىلارعا اسا ساق بولۋ كەرەك.
قازىر حيرۋرگ كوپ ۋاقىتىن جاستارعا ءبىلىم بەرۋگە جۇمساپ، ءوز تاجىريبەسىمەن بولىسەدى. ويتكەنى ءتيىستى ءبىلىم الماي، مەديتسينادا ۇلكەن جەتىستىككە قول جەتكىزۋ مۇمكىن ەمەس. «سەبەبى تابىسقا جەتۋدىڭ كىلتىن تەك ەڭبەكتەن تابۋعا بولادى»، - دەيدى ميشين.
www.24.kz
