قىتاي بيزنەسى سوماسى 300 ميلليون دوللاردان اساتىن جوبالاردى ىسكە اسىرۋعا قاتىسۋعا نيەتتى - اكىم ك. كوكىرەكبايەۆ

شي ان. قازاقپارات - بۇگىن «جىبەك جولى» حالىقارالىق جارمەڭكەسىنىڭ اياسىندا جامبىل وبلىسىنىڭ جانە ق ح ر شانشي پروۆينتسياسىنىڭ وكىلدەرى قىتايلىق كومپانيالاردىڭ سوماسى 300 ميلليون دوللاردان اساتىن (50 ميلليارد تەڭگە) وسى قازاقستاندىق وڭىردەگى جوبالاردى ىسكە اسىرۋعا قاتىسۋىن كوزدەيتىن ءبىرقاتار قۇجاتتارعا قول قويدى.

جامبىل وبلىسى اكىمدىگى مەن شانشي پروۆينتسياسىنىڭ حالىقتىق ۇكىمەتى اراسىندا اۋىل شارۋاشىلىعى، مەديتسينالىق، تۋريستىك جانە باسقا دا سالالارداعى ىنتىماقتاستىقتى ودان ءارى دامىتۋدى كوزدەيتىن ءوزارا ءىس- قيمىل تۋرالى مەموراندۋمعا قول قويىلدى.

سونداي- اق قىتايلىق كومپانيانىڭ تارازدىق ج ە و-4 قايتا جاڭعىرتۋعا (ينۆەستيتسيا كولەمى - 193,8 ميلليون دوللار نەمەسە 30 ميلليارد تەڭگە) ، جامبىل وبلىسىنداعى كۇن ەلەكتر ستانساسىنىڭ قۋاتىن 1,5 تەن 7 م ۆ ت-عا كەڭەيتۋ (13 ميلليون دوللار)، شىعارىلعان ونىمدەردىڭ ەۋرو 4 ستاندارتتارىنا سايكەس كەلۋى ءۇشىن جاڭا جابدىقتار مەن تەحنولوگيالاردى ەنگىزىپ، قولدانىستاعى گازدى قايتا وڭدەيتىن زاۋىتتى جاڭعىرتۋ (54 ميلليون دوللار) ، جەل ەلەكتر ستانساسىن 1,5 م ۆ ت-دان 21 م ۆ ت-عا دەيىن ۇلعايتۋعا قاتىسۋعا نيەتى تۋرالى مەموراندۋم جاسالدى.

«قازاقپارات» ح ا ا تىلشىسىنە بەرگەن سۇحباتىندا جامبىل وبلىسىنىڭ اكىمى كارىم كوكىرەكبايەۆ «بۇگىنگى قول قويىلعان مەموراندۋمدار بويىنشا جوبالاردىڭ جالپى قۇنى 50 ميلليارد تەڭگەدەن اسىپ تۇسەتىنىن» حابارلادى.

ول شانشي پروۆينتسياسى قىتايدىڭ جەتەكشى اۋىل شارۋاشىلىعى ءوڭىرى (الەمدەگى المانىڭ 10 پايىزى وسى جەردە وسىرىلەدى) بولىپ تابىلاتىنىن اتاپ ءوتتى. «ءبىز ولارمەن وسى سالادا بىرلەسىپ جۇمىس ىستەمەكپىز. ەجەلگى شي اندا ەكى مىڭجىلدىق تاريحى بار تاراز ارقىلى وتەتىن ۇلى جىبەك جولى باستالعان. سوندىقتان ءبىزدىڭ باۋىرلاس قالالار مەن وڭىرلەر اراسىندا تۋريستىك سالانى دامىتپاق ويىمىز بار. ەكسپو-2017 گە ءبىز تارازدىڭ ەجەلگى تاريحىمەن تانىستىرۋ ءۇشىن قىتايلىق تۋريستەردى مولىنان تارتۋعا نيەتتىمىز»، - دەدى ك. كوكىرەكبايەۆ.

ق ر جامبىل وبلىسىنداعى تاراز بەن ق ح ر شانشي پروۆينتسياسىنداعى شي ان تۋىستاس قالالار بولىپ تابىلادى. جامبىل وبلىسىنىڭ دەلەگاتسياسىمەن 40 تان استام ادام كەلدى: اكىمدىك قىزمەتكەرلەرى، بيزنەسمەندەر، ج و و رەكتورلارى. ولار شانشيلىك ج و و-لاردىڭ تىنىس-تىرشىلىگىمەن تانىسادى.

ەسكە سالا كەتەيىك، شي ان قالاسىندا 18-شى ساۋدا-ينۆەستيتسيالىق كورمەسى مەن «جىبەك جولى» جارمەڭكەسى وتۋدە. وعان قىتايدىڭ بارلىق پروۆينتسياسىنان، اۆتونوميالىق ولكەلەرىنەن، ورتالىق باعىنىستاعى قالالارىنان 674 دەلەگاتسيا جانە 77 ەل قاتىسۋدا.

اتالمىش الاڭدا «KazNex Invest» جانە قازاقستاننىڭ دۇڭعان قاۋىمداستىعىمەن قاتار، «قازاقپارات» ح ا ا تانىستىرىلىمى ءوتتى.