الاتاۋ ارنايى ەكونوميكالىق ايماعىندا قۇنى 300 ميلليارد تەڭگەگە جۋىقتايتىن 32 جوبا قابىلداندى

الماتى. قازاقپارات - الماتىداعى «الاتاۋ» ارنايى ەكونوميكالىق ايماعىندا قۇنى 298 ميلليارد تەڭگە بولاتىن 32 جوبا جۇزەگە اسپاق. جاڭا ەكونوميكالىق ايماق كەلەر جىلدان باستاپ جۇمىس جاسايتىن بولادى.  

بۇل تۋرالى قالالىق كاسىپكەرلىك جانە يندۋستريالدىق- يننوۆاتسيالىق دامۋ باسقارماسىنىڭ باسشىسى ءالفيا بالوۆا ايتتى.   

 ونىڭ ايتۋىنشا، ارنايى ەكونوميكالىق ايماقتىڭ قۇرىلىسى اياقتالۋعا جاقىن. بيىل اتالعان ايماقتا ينفراقۇرىلىم جۇرگىزۋ جۇمىستارى اياقتالادى. بۇگىندە جۇمىس رەسپۋبليكالىق بيۋدجەتتەن بولىنەتىن قارجىعا كەپ تىرەلىپ وتىر. قاجەتتى قارجىنىڭ 80 پايىزى الىندى. كەلەر جىلى ايماقتى كوگىلدىر وتىنمەن قامتۋ جۇمىستارى باستالادى. 
   
 «سونداي- اق تەك رەسپۋبليكالىق قارجىعا قاراماي، قوسىمشا ينۆەستورلار تارتۋ جۇمىستارىن جۇرگىزىپ وتىرمىز. ايماق 7 بولىككە: ماشيناجاساۋ كاسىپورىندارى، قۇرىلىس يندۋسترياسى، فارماتسيا، جەڭىل جانە تاماق ونەركاسىبى، حيميالىق ونەركاسىپ دەپ بولىنگەن. قازىردىڭ وزىندە قۇنى 298 ميلليارد تەڭگە بولاتىن 32 جوبا ماقۇلداندى. 11 جوبا بويىنشا ورنالاسۋ جۇمىستارى جاسالىپ جاتىر. 5 كاسىپورىن بولاشاق زاۋىتتىڭ ىرگەتاسىن سالۋدا. 2016 - جىلى كاسىپورىنداردىڭ كوپشىلىگى جاڭا ايماققا قونىس اۋدارادى»، - دەدى ءا. بالوۆا.   

 ايتا كەتۋ كەرەك، اتالعان جاڭا ەكونوميكالىق ايماقتا يندۋستريالدىق دامۋدىڭ 2015-2020 - جىلعى ەكىنشى بەسجىلدىعىنا كىرەتىن بىرنەشە زاۋىت پەن ءوندىرىس ورىندارى ورنالاساتىن بولادى.

اۆتور:   گۇلميرا عوسمانالي