اتىراۋداعى تەمىرجول ۆوكزالىندا 30 جاستاعى ايەلدەن 80 ءدىني كىتاپ تاركىلەندى
كولىكتەگى پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، اتىراۋ ستانتسياسىنداعى جەلىلىك پوليتسيا ءبولىمىنىڭ قىزمەتكەرلەرى تەمىرجول ۆوكزالىندا جەدەل- ىزدەستىرۋ ءىس-شاراسىن جۇرگىزگەن.
«ءىس-شارا كەزىندە اتىراۋ قالاسىنىڭ 30 جاستاعى تۇرعىنى انىقتالىپ، ۇستالدى. تەكسەرۋ بارىسىندا ودان ءدىني مازمۇنداعى 80 كىتاپ تابىلىپ، تاركىلەندى. كولىك پوليتسەيلەرى اتالعان ازاماتشاعا قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 490-بابى 1-بولىگىنىڭ 3-تارماعىمەن (ءدىني ادەبيەتتى جانە ءدىني مازمۇنداعى وزگە دە ماتەريالداردى، ءدىني ماقساتتاعى زاتتاردى اكەلۋگە، ازىرلەۋگە، شىعارۋعا، باسىپ شىعارۋعا جانە (نەمەسە) تاراتۋعا بەلگىلەنگەن تالاپتاردى بۇزۋ) اكىمشىلىك حاتتاما تولتىردى. ءىس ماتەريالدارى سوتقا جولداندى»، - دەپ حابارلادى دەپارتامەنتتىڭ باسپا ءسوز قىزمەتى.
اتىراۋ قالاسىنىڭ مامانداندىرىلعان اۋدانارالىق اكىمشىلىك سوتىنىڭ قاۋلىسىمەن قۇقىق بۇزۋشى اكىمشىلىك جاۋاپكەرشىلىككە تارتىلىپ، وعان 172500 تەڭگە مولشەرىندە ايىپپۇل سالىندى.
«ەلىمىزدىڭ «ءدىني قىزمەتتەر جانە ءدىني بىرلەستىكتەر تۋرالى» زاڭىنا سايكەس ءدىني ادەبيەتتەردى، ءدىني سيپاتتاعى ماتەريالدار مەن زاتتاردى تاراتۋ تەك ءدىني راسىمدىك عيماراتتاردا، ءدىني ءبىلىم مەكەمەلەرىندە جانە جەرگىلىكتى اتقارۋشى ورگاندار بەكىتكەن ارنايى ستاتسيونارلىق ورىنداردا عانا جۇزەگە اسىرىلادى. سوعان بايلانىستى تۇرعىندارعا اتالعان زاڭ تالابىن قاتاڭ ساقتاۋدى ەسكەرتەمىز»، - دەپ ءمالىم ەتتى دەپارتامەنتتىڭ باسپا ءسوز قىزمەتى.
ەسكە سالا كەتەلىك، بۇعان دەيىن اتىراۋ ءبىلىم باسقارماسى مەكتەپ فورماسىنا ءدىني كيىم ەلەمەنتىن قوسۋعا رۇقسات بەرىلمەيتىنىن ءمالىم ەتكەنىن جازعان ەدىك.
