شەكاراداعى ايماقتاردا 3,5 مىڭنان استام مال ۇرلاۋ وقيعاسى تىركەلگەن

استانا. قازاقپارات -قازاقستان مەن رەسەيدىڭ شەكارالىق ايماقتارىندا 3,5 مىڭنان استام مال ۇرلاۋ وقيعاسى تىركەلگەن، - دەپ حابارلايدى Baq.kz ءتىلشىسى.

بۇل جونىندە قازاقستان رەسپۋبليكاسى باس پروكۋراتۋراسىنىڭ ەكىنشى دەپارتامەنت باسشىسى تىلەۋ جانعاراشيەۆ مالىمدەدى.

 - شىندىعىندا دا قازاقستان مەن قازاقتار ءۇشىن مال ۇرلاۋدىڭ وزىندىك تاريحى بار. كەزىندە مال ۇرلاۋمەن جەكەلەگەن ادامدار عانا ەمەس، تابىن-تابىن ەتىپ الىپ كەتۋمەن اۋىلدار دا اينالىسقان. قازىرگى ۋاقىتتا ونداي جاعدايلار جوق. الايدا ۇستىمىزدەگى جىلدىڭ جارتى جىلدىق قورىتىندىسى بويىنشا قازاقستان مەن رەسەي فەدەراتسياسىنىڭ شەكارالىق ايماعىندا 3743 مال ۇرلاۋ وقيعاسى تىركەلگەن، - دەدى ول.

سونىمەن قاتار باسشى نەگىزىنەن ءىرى قارا مالدىڭ ۇرلاناتىندىعىن جانە ۇرلىقتىڭ 10 پايىزى عانا اشىلاتىندىعىن اتاپ ءوتتى. قىلمىستىق جاۋاپكەرشىلىككە تارتاتىن تۇلعالاردىڭ بولماۋىنا بايلانىستى مۇنداي قىلمىستاردىڭ باسىم بولىگى توقتاتىلادى.