گەرمانيانىڭ 3,3 مىڭ ادامدى ولتىرگەن 98 جاستاعى تۇرعىنىنا ايىپ تاعىلدى
گەرمانيانىڭ گيسەن قالاسىنىڭ پروكۋراتۋراسى 98 جاستاعى ەر ادامعا ايىپ تاعىپ وتىر. ول جاسوسپىرىم كەزىندە - 1943 -جىلدىڭ شىلدەسىنەن 1945 -جىلدىڭ اقپانىنا دەيىنگى ارالىقتا زاكسەنحاۋزەن كونسلاگەرىن كۇزەتكەن س س بولىمشەلەرىندە قىزمەت ەتكەن. وسى جىلدار ىشىندە 3300-دەن استام ادام قاتىگەزدىكپەن ولتىرىلگەن.
كونسلاگەردەگى قىزمەتى كەزىندە ول جاسوسپىرىم بولعان. سول سەبەپتى قىلمىستىق جاۋاپقا تارتىلماعان.
پروكۋراتۋرانىڭ ايتۋىنشا، قازىرگى ايىپتاۋدىڭ قانشالىقتى نەگىزى بار ەكەنىن حاناۋ قالاسى سوتىنىڭ كامەلەتكە تولماعانداردىڭ قىلمىستىق ىستەرى جونىندەگى پالاتاسى قاراپ جاتىر. سەبەبى كامەلەت جاسىنا تولماعاندار ءىسىن ولاردىڭ تۇرعىلىقتى جەرىندەگى سوت قارايدى.
بىلتىر قازاندا جۇرگىزىلگەن پسيحياتريالىق تالداۋ قورىتىندىسى ەر ادام «ءوز ارەكەتىنە جاۋاپكەرشىلىگى شەكتەۋلى» ەكەنىن انىقتاعان.
زاكسەنحاۋزەن كونسلاگەرى 1936 -جىلى بەرليننەن سولتۇستىككە قاراي ورانيەنبۋرگ قالاسىندا قۇرىلدى. لاگەردە 200 مىڭ ادام قاماۋدا بولىپ، ونىڭ 100 مىڭنان استامى ولتىرىلگەن. 1945 -جىلدىڭ ساۋىرىندە لاگەرگە كەڭەس اسكەرى باسىپ كىردى. سوعىستان كەيىن زاكسەنحاۋزەن ك س ر و باقىلاۋىنا كوشىپ، №7 ەرەكشە لاگەرگە اينالىپ، 1945 -جىلدىڭ تامىزىنان 1950 -جىلدىڭ ناۋرىزىنا دەيىن ساياسي تۇتقىندارعا ارنالعان تۇرمە رەتىندە پايدالانىلدى. سوعىستان كەيىنگى بەس جىل ىشىندە №7 ارنايى لاگەردە 60 مىڭ تۇتقىن بولىپ، ونىڭ 12 مىڭعا جۋىعى كوز جۇمعان.
