ن. نازاربايەۆ: الداعى 3 جىلدا جاڭا جولدار، ەلەكتر جەلىلەرىن، كوممۋنيكاتسيالار سالۋعا 14 ميلليارد دوللاردان استام قارجى جۇمسالادى
بۇل تۋرالى بۇگىن «ينفراقۇرىلىم: ەكونوميكانىڭ ورنىقتى ءوسىمىنىڭ درايۆەرى» تاقىرىبىنداعى VIII استانا ەكونوميكالىق فورۋمىنىڭ جالپى وتىرىسىندا ەلباسى نۇرسۇلتان نازاربايەۆ ايتتى.
«ينفراقۇرىلىم سالۋ بىزدەر ءۇشىن اسا ماڭىزدى ءارى مول ينۆەستيتسيانى تالاپ ەتەدى. دەگەنمەن، بولاشاق ۇرپاققا قالاتىن مۇرا رەتىندە عاسىرلارعا تاتىرلىق مانگە يە»، - دەدى مەملەكەت باسشىسى.
ەلباسى ءوز سوزىندە «ۇلى دەپرەسسيا جىلدارىندا» امەريكادا 2 ميلليون شاقىرىم جول، مەكتەپ، اۋرۋحانا جانە باسقا دا الەۋمەتتىك نىساندار سالىنعانىن اتاپ ءوتتى.
«تەك الداعى 3 جىلدىڭ ىشىندە عانا جاڭا جولدار، ەلەكتر جەلىلەرىن، كوممۋنيكاتسيالار سالۋعا 14 ميلليارد ا ق ش دوللارىنان استام قارجى جۇمسالاتىن بولادى. ياعني، ءبىز ءوزىمىزدىڭ جەر قويناۋىمىزدان الىناتىن مۇناي، گاز جانە باسقا دا پايدالى قازبالاردىڭ ەكسپورتىنان تۇسكەن اقشانى ۇلتتىق قورعا جينادىق. ەندى الەمدىك داعدارىس جاعدايىندا كونترتسيكلدىك ساياساتتى جۇرگىزۋدەمىز»، - دەدى ق ر پرەزيدەنتى.
مەملەكەت باسشىسى سىرتتان الىناتىن قارجىنىڭ ۇشتەن ءبىرىن قازاقستاننىڭ سەرىكتەسى سانالاتىن حالىقارالىق قارجى ينستيتۋتتارى بولگەندىگىن اتاپ ءوتتى.
«ءبىز ولارعا مۇنداي زور سەنىم بىلدىرگەندەرى ءۇشىن شىنايى ريزاشىلىعىمىزدى بىلدىرەمىز. ولاردى ۇياتقا قالدىرماۋعا تىرىسامىز»، - دەدى ن. نازاربايەۆ.
اۆتور: مارلان جيەمباي
