اتىراۋ وبلىسىنىڭ تراسساسىندا 2 ادام مەرت بولىپ، ۇشەۋى اۋرۋحاناعا ءتۇستى
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جول-كولىك وقيعاسى كەشە، 21-تامىز كۇنى ساعات 19:30 شاماسىندا بولعان.
«جول اپاتى اقتوبە - اتىراۋ - استراحان (رەسەي فەدەراتسياسى) باعىتىنداعى رەسپۋبليكالىق تاسجولدا تىركەلدى. اتالعان جولدىڭ 635-شاقىرىمى تۇسىندا Toyota Prada جانە Lada Granta اۆتوكولىكتەرى سوقتىعىستى. سالدارىنان Lada Granta اۆتوكولىگىندەگى 2 جولاۋشى وقيعا ورنىندا مەرت بولدى. ال Lada Granta جۇرگىزۋشىسى مەن Toyota Prada كولىگىنىڭ 2 جولاۋشىسى وبلىستىق اۋرۋحاناعا جەتكىزىلدى»، - دەپ حابارلادى دەپارتامەنتتىڭ باسپا ءسوز قىزمەتىنەن.
قازىر پوليتسيا قىزمەتكەرلەرى جول-كولىك وقيعاسىنا بايلانىستى تەرگەۋ امالدارىن جۇرگىزۋدى باستادى.
ەسكە سالا كەتەلىك، بۇعان دەيىن اتىراۋ وبلىسىندا كەيىنگى ەكى ايدا 4 جول اپاتىنان 20 ادام مەرت بولعانىن جازعان ەدىك. قايعىلى جاعدايلار ءوڭىردىڭ رەسپۋبليكالىق جولدارىندا بولعان.
جول-كولىك وقيعالارىنىڭ باستى سەبەبى - جۇرگىزۋشىلەردىڭ جولدا ءجۇرۋ ەرەجەسىن ساقتاماۋى، قارسى باعىتقا شىعۋى، جىلدامدىقتى اسىرۋى.
