بىلتىر ۇلتتىق پاركتەرگە 2 ميلليوننان استام ادام بارعان
بۇل تۋرالى ب ا ق وكىلدەرىنىڭ قاتىسۋىمەن وتكەن بريفينگىدە ەكولوگيا مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى دانيار تۇرعامبايەۆ ايتتى، دەپ حابارلايدى قازاقپارات ءتىلشىسى.
«بىلتىر ەرەكشە قورعالاتىن تابيعي اۋماقتا باقىلاۋ- ينسپەكتسيالىق قىزمەت شەڭبەرىندە 2992 رەيد جۇرگىزىلىپ 44 قۇقىق بۇزۋشىلىق انىقتالدى. ناتيجەسىندە 655 ادامعا 640 ميلليون تەڭگە كولەمىندە ايىپپۇل سالىندى»، - دەپ ءمالىم ەتتى دانيار تۇرعامبايەۆ.
سونىمەن قاتار، ونىڭ ايتۋىنشا، وتكەن جىلى ۇلتتىق پاركتەرگە كەلۋشىلەر سانى 2 ميلليون استى. بۇل 2021 -جىلمەن سالىستىرعاندا %25 عا كوپ.
«ەرەكشە قورعالاتىن تابيعي اۋماقتاردى پايدالانعانى ءۇشىن تولەماقى جيناۋدىڭ اشىقتىعىن قامتاماسىز ەتۋ جانە سىبايلاس جەمقورلىق تاۋەكەلدەرىن ازايتۋ ماقساتىندا ۇلتتىق پاركتەردىڭ باقىلاۋ- وتكىزۋ پۋنكتتەرىن اۆتوماتتاندىرۋ بويىنشا جۇمىستار جۇرگىزىلۋدە. «كولساي كولدەرى» ۇلتتىق پاركىندە «كولساي» باقىلاۋ- وتكىزۋ پۋنكتى اۆتوماتتاندىرىلدى، سونداي- اق تولەمدەردى قابىلداۋدىڭ ينتەگراتسيالانعان جۇيەسىمەن جاڭا سايت ازىرلەندى. اتالعان جۇمىستىڭ قورىتىندىسى بويىنشا وسى ءتاسىلدى بارلىق ۇلتتىق پاركتەرگە ەنگىزۋ مۇمكىندىگى قاراستىرىلۋدا. بيىل ىلە- الاتاۋى، شارىن جانە باياناۋىل ۇلتتىق پاركتەرىندە باقىلاۋ- وتكىزۋ پۋنكتتەرىن اۆتوماتتاندىرۋ جوسپارلانۋدا»، - دەپ ءبولىستى كوميتەت ءتوراعاسىنىڭ ورىنباسارى.
بۇعان دەيىن حابارلاعانىمىزداي، قازاقستاننىڭ ۇلتتىق پاركتەرىندە مۇگەدەكتىگى بار ادامدار ءۇشىن قولايلى جاعداي جاسالادى.