ءۇش ساعاتتا 2 ميلليون تەڭگە: قازاقستاندىقتار كوپتىڭ جۇرەگىن ەلجىرەتكەن قارياعا كومەكتەستى
Instagram جەلىسىندەگى مالىمەت بويىنشا، پاۆلودارلىق قاريانىڭ جەكە ەسەپشوتىنا جەتكىلىكتى قاراجات جينالعان. ءبىراق قاريا جينالعان اقشانىڭ ناقتى كولەمىن جاريالاماۋدى ءجون كورگەن.
العاشقى بولىپ قارجى جيناۋدى ەكىباستۇز قالاسىنىڭ تۇرعىنى دينارا مولدانازاروۆا ۇيىمداستىرعان. قارياعا بانك كارتاسىن اشۋعا كومەكتەسكەننەن كەيىن ول اقشا جيناۋدى توقتاتقان. ءبىراق قازاقستاندىقتار 85 جاستاعى ەفيم نيكيتيچتىڭ ەسەپشوتىنا اقشا اۋدارۋدى توقتاتپاعان. ءبىر كۇننەن كەيىن زەينەتكەر Instagram جەلىسىندە وعان جاناشىرلىق تانىتىپ، كومەك كورسەتكەندەردىڭ بارىنە العىسىن ءبىلدىردى.
«قازىر قاجەتتى سومانى جينادىق، اقشا جىبەرۋدى توقتاتۋدى سۇرايمىن. ساۋ بولىڭىزدار، بارىنە باقىت تىلەيمىن»، - دەيدى قاريا.
ۆيدەو سىرتىندا ەر ادام جينالعان قاراجات جەتكىلىكتى ەكەنىن ايتادى.
«ءبىر كۇندە وتە جاقسى سومانى جينادىق. ونىڭ ۇستىنە، ەفيم نيكيتيچتە جاڭا كولىك الۋعا دا اقشا قالادى»، - دەدى ەر ادام.
قاريا جول اپاتىنا ءوزىن كىنالى سانايدى. وسىعان قاراماستان، الەۋمەتتىك جەلى قولدانۋشىلارى شەتەلدىك كولىك جۇرگىزۋشىسىنە قارت ادامعا مەيىرىمدىلىك تانىتىپ، كولىكتى جوندەۋدى تالاپ ەتپەۋدى ءوتىندى. دەگەنمەن، جوندەۋ ءۇشىن اقشا تولەۋگە تۋرا كەلەدى.
«اتانىڭ ساقتاندىرۋى جوق، ونىڭ ۇستىنە، Toyota كولىگىن يەسىنىڭ ءوزى ەمەس، جۇرگىزۋشى تىزگىندەگەن. قاتەلىك اتادان كەتكەن. شەتەلدىك كولىك قاتتى زاقىمدالعان. سوندىقتان قالپىنا كەلتىرۋ ءۇشىن اقشا تولەۋگە تۋرا كەلەدى. ءقازىر شىعىن ەسەپتەلىپ جاتىر، سوماسى بەلگىلى بولعاننان كەيىن جينالعان اقشانى تەحنيكالىق قىزمەت كورسەتۋ ستانتسياسىنا اۋدارامىن»، - دەدى مولدانازاروۆا.
ەرىكتىلەردىڭ ايتۋىنشا، ەفيم نيكيتيچتىڭ ەسكى كولىگىن قالپىنا كەلتىرۋ مۇمكىن ەمەس. ءبىراق بۇل ەندى ماڭىزدى ەمەس. اسىلبەك اندابايەۆ ەسىمدى ەر ادام «زاپوروجەتس» كولىگىن زەينەتكەرگە بەرۋگە دايىن. ەر ادام ءتىس دارىگەرى بولىپ جۇمىس ىستەيتىنىن، قازىر رەسەيدە ءبىلىم الىپ جاتقانىن ايتتى. ول اپتانىڭ اياعىنا دەيىن ورالىپ، كولىكتى پاۆلودارلىق قارياعا سىيلاۋعا ۋادە بەرگەن.
ەسكە سالايىق، بۇزىلعان «زاپوروجەتس» كولىگى جانىندا مۇڭايىپ تۇرعان زەينەتكەردىڭ ۆيدەوسى الەۋمەتتىك جەلى قولدانۋشىلارىن ەلجىرەتكەن بولاتىن. جەلى قولدانۋشىلارى ەسكى كولىكتى جوندەۋ نەمەسە جاڭاسىن ساتىپ الۋ ءۇشىن اقشا جيناۋعا كىرىسكەن.
