ادامدار نەگە اپتاسىنا 2 كۇن دەمالادى؟
ال ⅩⅩ عاسىردىڭ باسىندا وندىرىستە جۇمىس ىستەيتىندەر جارتى كۇن عانا دەمالاتىن. كەيىن ءبىر كۇنگە جەتتى. دەسە دە، قازىرگى ادام اپتاسىنا ەكى كۇندى - سەنبى مەن جەكسەنبىنى دەمالىسقا ارناۋدى قايدان شىعارعان؟
جالپى ادامزات اپتانىڭ ءبىر كۇنىن دەمالىسقا ارناۋدى ەرتەدەن ادەتكە اينالدىرعان. وتىرىقشى حالىقتار ەگىن جانە ديقانشىلىقپەن اينالىسىپ، قۇداي دەمالعان ءبىر كۇندى - جەكسەنبىنى دەمالىسقا، قۇلشىلىق ەتۋگە ارناعان. كەيىن يندۋستريالدى ريەۆوليۋتسيا باستالىپ، ەۋروپادا ءوندىرىس وشاقتارى اشىلىپ، ادامدار جاپپاي زاۋىت پەن فابريكاعا جۇمىسقا ورنالاسا باستادى. زاۋىت اكىمشىلىگى قۇدايعا قۇلشىلىق ەتەتىن كۇندى جۇمىسشىلارىنا دەمالىس ەتىپ بەرگەن ەكەن.
الايدا وندىرىستەن شارشاعان جۇمىسشىلار بۇل كۇندى قۇلشىلىققا ەمەس، كوڭىل كوتەرۋگە ارناپ، «تويلاتىپ كەتەدى» ەكەن. سودان ءبىرى «باس اۋىرىپ»، ءبىرى اۋرۋحاناعا ءتۇسىپ، تاعى ءبىرىنىڭ جۇمىس ىستەۋگە زاۋقى سوقپاي، جۇمىسقا كەلمەي قالاتىنى جيىلەگەن.
زاۋىت باسشىلارى باسىندا نە ىستەرىن بىلمەي، جۇمىسشىلارمەن ءتۇرلى كەلىسىمگە كەلۋگە تىرىستى. ءبىرى سەنبىنىڭ جارتى كۇنىن دەمالىس ەتىپ بەرسە، ەندى ءبىرى جۇمىسقا ۋاقىتىندا كەلگەنى ءۇشىن سىياقى بەرگەن كورىنەدى. سوندا دا ماسەلە شەشىلمەسە كەرەك.
سودان 1908-جىلى امەريكاداعى فابريكا ەۆرەيلەردىڭ سەنبى كۇنگى مەرەكەسىنە قۇرمەت ءبىلدىرۋ ءۇشىن جۇمىسشىلارعا سەنبىنى دە دەمالىس ەتىپ بەرەدى. مۇنى كورگەن ەۋروپا كاسىپكەرلەرى دە جۇمىسشىلارىنا 2 كۇن قاتارىنان دەمالىس بەرۋگە ءماجبۇر بولادى.
بەس كۇندىك جۇمىس كۇنى مەن ەكى كۇندىك دەمالىس قازىر بۇكىل الەمدە زاڭدىلىققا اينالعان دەمالۋ رەجيمى. ءبىراق دەمالىس كۇنى كەي ەلدە ءارتۇرلى بولۋى مۇمكىن.
قازاقستاندا بەس كۇندىك جۇمىس اپتاسى 1967-جىلى كەلگەن. كەڭەس وداعى جۇمىسشىلارىنىڭ جۇمىس ۋاقىتى 1 كۇندە 8 ساعات، ءبىر اپتادا 48 ساعاتتان اسپاعان.
massaget.kz