شەتەلدە وقىپ جۇرگەن 2 مىڭنان استام ستۋدەنت قازاقستانداعى ج و و-عا اۋىستى
بۇل تۋرالى قازاقپارات ءتىلشىسى ب ع م سىلتەمە جاساپ حابارلايدى.
ءبىلىم مينيسترلىگىنىڭ حابارلاۋىنشا، بۇعان دەيىن شەتەلدىك جوعارى وقۋ ورىندارىندا ءوز بەتىنشە وقىعان قازاقستاندىق ستۋدەنتتەرگە قازاقستانداعى جوعارى وقۋ ورىندارىنا اۋىسۋعا كومەك جاسالعان. «ستۋدەنتەرگە قۇجاتتاردى راسىمدەۋ بارىسىندا ج و و-لاردىڭ ۆيرتۋالدى قابىلداۋ كوميسسيالارى ارقىلى جەڭىلدەتىلگەن فورمات ۇسىنىلدى. شەتەلدىك جوعارى وقۋ ورىندارىنىڭ باسىم بولىگى قازاقستاندىق ج و و- لار سياقتى وقۋ جىلىن قاشىقتان ءبىلىم بەرۋ تەحنولوگيالارىن پايدالانا وتىرىپ باستادى. الايدا، كەيبىر شەتەلدىك ج و و-لار ءوز ستۋدەنتتەرىنە قاشىقتان وقىتۋدى جالعاستىرۋ ءۇشىن پلاتفورمالار ۇسىنا المادى»، - دەدى مينيسترلىك.
تامىز ايىنىڭ باسىندا ب ع م وقۋىن جالعاستىرۋ ءۇشىن وزىنە بايلانىستى ەمەس سەبەپتەر بويىنشا ەلدەن شىعا الماعان ستۋدەنتتەرگە كومەك كورسەتە باستاعان.
«الدىن الا قابىلدانعان شەشىمدەردىڭ ارقاسىندا 2 مىڭنان استام قازاقستاندىق ستۋدەنت ەلدەگى جوعارى وقۋ ورىندارىنا اۋىسۋعا نيەت ءبىلدىردى. وسى ساناتتاعى ازاماتتاردى قولداۋ ماقساتىندا ارنايى جەدەل جەلى ىسكە قوسىلىپ، قۇجاتتاردى قابىلداۋ پروتسەدۋراسى جەڭىلدەتىلدى»، - دەپ تولىقتىردى ۆەدومستۆو.
