قازاقستاندىق عالىمدار اۋىل شارۋاشىلىعى سالاسىندا 2 ۆاكسينا ويلاپ تاپتى

نۇر- سۇلتان. قازاقپارات - قازاق عىلىمي- زەرتتەۋ ۆەتەريناريا ينستيتۋتىنىڭ عالىمدارى مالدى نەكروباكتەريوز اۋرۋىنان قورعايتىن ەكى ۆاكسينانى ويلاپ شىعاردى. وتاندىق عالىمداردىڭ ونىمدەرى قازىر قولدانىستا، دەپ حابارلايدى قازاقپارات ءتىلشىسى.

ەكى پرەپاراتتىڭ ءبىرى - ءىرى قارا مەن ۇساق مالدىڭ نەكروباكتەريوز اۋرۋىنا قارسى ۆاكسيناسى بولسا، ەكىنشىسى - نەكروباكتەريوز بەن سيراقتىڭ ىسىنۋىنە قارسى ارالاس ۆاكسينا. اتالمىش ۆاكسينالاردى شارۋا قوجالىقتار قازىرگى تاڭدا كەڭىنەن پايدالانۋدا.

«پرەپاراتتىڭ تيىمدىلىگىن ارتتىرۋ ءۇشىن ونى دايىنداعان كەزدە جەرگىلىكتى اۋرۋ قوزدىراتىن ەپيزووتيكالىق شوپتەر قولدانىلدى. اتالمىش پرەپاراتتار ساۋ مالمەن بىرگە، اۋرۋ (اقساق) مالعا دا پايدالانۋعا بولاتىنداي تەحنولوگيامەن جاسالعان. مالدىڭ تۇرلەرىنە جۇرگىزىلگەن زەرتتەۋ جۇمىستارى بۇل ۆاكسينالاردىڭ يممۋنوگەندىگى جوعارى ەكەنىن كورسەتتى. ولاردىڭ اۋرۋلاردىڭ الدىن الۋ تيىمدىلىگى 85,7 پايىزدان 98,9 پايىزدىق كورسەتكىشكە يە. شارۋا قوجالىقتار ءۇشىن بۇل ۆاكسينالار قىمباتقا تۇسپەيدى»، - دەپ حابارلايدى «ۇلتتىق اگرارلىق عىلىمي- ءبىلىم بەرۋ ورتالىعى» ك ە ا ق باسپا ءسوز قىزمەتىنەن.

مالدىڭ تۇياعى نەمەسە سيراعىندا كەزدەسەتىن اۋرۋ شارۋا قوجالىقتارعا ايتارلىقتاي شىعىن كەلتىرەدى. بۇل اۋرۋلار مالدىڭ سۇتتىلىگىن 25-تەن 50 پايىزعا دەيىن تومەندەتۋى مۇمكىن. «ءىرى قارا مالدىڭ سيراعىنا كوپ كەزدەسەتىن پاتولوگيا - نەكروباكتەريوز، ال ۇساق مالدا كوبىنەسە سيراقتىڭ ءىسىنۋى كوپ كەزدەسەدى. بۇل اۋرۋلاردى كەشەندى تۇردە ەرتە باستاۋ كەرەك»، - دەلىنگەن حابارلامادا.

اۆتور: ايان بەكەن ۇلى