قازاقستاندىق ورەندەر ماتەماتيكالىق وليمپياداسىنىڭ تاريحىندا العاش رەت 2-ورىنعا يە بولدى

نۇر-سۇلتان. قازاقپارات - قازاقستان قۇراما كومانداسى بالقان جاسوسپىرىمدەر وليمپياداسىنىڭ تاريحىندا العاش رەت ەكىنشى ورىنعا يە بولدى، دەپ حابارلايدى قازاقپارات ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

كيپردىڭ لارناكا قالاسىندا جاسوسپىرىمدەر اراسىندا 23- بالقان ماتەماتيكالىق وليمپياداسى ءوتتى. وليمپياداعا 17 رەسمي كوماندا (بالقان ايماعىنىڭ 10 مەملەكەتى) جانە 7 قوناق كوماندا (ءازىربايجان، حورۆاتيا، ەكۆادور، فرانسيا، ساۋد ارابياسى، نيگەريا جانە قازاقستان)، جالپى سانى 112 وقۋشى قاتىستى. وليمپيادانى كيپر رەسپۋبليكاسىنىڭ ماتەماتيكتەر وداعى ۇيىمداستىردى.

«قازاقستان قۇراما كومانداسى بىرنەشە جىل بويى وسى وليمپياداعا قوناق- كوماندا رەتىندە قاتىسىپ كەلەدى. قازاقستاندىق ورەندەر بالقان جاسوسپىرىمدەر وليمپياداسىنىڭ تاريحىندا العاش رەت ەكىنشى ورىندى يەلەندى. وليمپيادا قورىتىندىسى بويىنشا قازاقستان كومانداسى 2 التىن، 3 كۇمىس جانە 1 قولا مەدال جەڭىپ الدى» دەلىنگەن حابارلامادا.

كوماندا قۇراما كومانداسىنا كىرگەن قازاقستاندىق وقۋشىلار جاقسى ناتيجەلەرگە قول جەتكىزدى: مىرزاتايەۆ ايبەك - التىن مەدال («ءبىلىم- يننوۆاتسيا» ليتسەي- ينتەرناتىنىڭ 9-سىنىپ وقۋشىسى، اتىراۋ قالاسى)؛ تەن يۋري - التىن مەدال («Haileybury» حالىقارالىق مەكتەبىنىڭ 9-سىنىپ وقۋشىسى، الماتى قالاسى)؛ راۋشانوۆ مارلەن - كۇمىس مەدال (دارىندى بالالارعا ارنالعان «ءبىلىم- يننوۆاتسيا» ليتسەي- ينتەرناتىنىڭ 9-سىنىپ وقۋشىسى، نۇر-سۇلتان قالاسى)؛ ساكەنوۆ باتىرحان - كۇمىس مەدال («رەسپۋبليكالىق فيزيكا- ماتەماتيكا مەكتەبى» كەاق- نىڭ 9-سىنىپ وقۋشىسى، الماتى قالاسى)؛ قالدىبەك ەراسىل - كۇمىس مەدال («ءبىلىم- يننوۆاتسيا» مەكتەپ- ينتەرناتىنىڭ 9-سىنىپ وقۋشىسى، تاراز قالاسى)؛ ابدىكارىموۆ بەكسۇلتان - قولا مەدال (دارىندى بالالارعا ارنالعان «ءبىلىم- يننوۆاتسيا» ليتسەي- ينتەرناتىنىڭ 9-سىنىپ وقۋشىسى، نۇر- سۇلتان قالاسى).

وليمپيادا قورىتىندىسى بويىنشا قازاقستان قۇراما كومانداسى گەومەتريادان ەسەپتەردى شەشۋدەگى ۇزدىكتەردىڭ قاتارىنان تابىلعانىن اتاپ وتكەن ءجون.