كۇنىنە 2 ليتر سۋ ءىشۋ دۇرىس پا؟

 استانا. قازاقپارات - سۋ - ءتاتتى. ونىڭ ءدامى، مولدىرلىگى، پايداسىن بايقاي بەرمەيمىز.

اعزانى، ميدى، سانانى رەتتەپ، ىسكە بەرەكە بەرەتىنىن، ءتىپتى، مازاسىز ادامدى تىنىشتاندىراتىنىن ونىڭ ەرەكشەلىگى دەپ تۇسىنگەن ابزال. سۋ ۋاقىت تالعامايدى، ءبىراق كولەم تالعايدى. كۇنىنە 2 ليتر سۋ ءىشۋ كەرەك دەگەن قاعيدا دۇرىس پا؟ سۇراقتىڭ جاۋابىن جانە سۋدىڭ مۇمكىندىكتەرىن بىرگە انىقتاپ كورەيىك.

بىزگە سۋدىڭ قانداي مولشەرى كەرەك؟

ادەتتە كوپشىلىك ادام كۇنىنە 2 ليتر سۋ ءىشۋى ءتيىس دەيدى. ءبىراق بارلىق ادام ءارتۇرلى، ولاردىڭ اعزاسى، سالماعى، جاس ەرەكشەلىگى بىردەي ەمەس. 2 ليتر سۋ ءىشۋ كەرەك دەپ جاي ايتا سالۋ وڭاي. دەگەنمەن، كەي ادامدار سۋدى كوپ قاجەت ەتەتىن جۇمىس جاساۋى مۇمكىن. كۇنىنە ەر ادام مەن ايەل ادامنىڭ قانشا ليتر سۋ ءىشۋ كەرەكتىگىن انىقتايتىن مىناداي فورمۋلا بار:

- ەر ادام: ءوز سالماعىن 35-كە كوبەيتەدى.

- ايەل ادام: ءوز سالماعىن 31-گە كوبەيتەدى.

ناتيجە ميلليمەرتمەن كورسەتىلەدى. شامامەن سونداي كولەمدە سۋ ىشكەنى ابزال ەكەن.

سۋدى قالاعان ۋاقىتتا ىشۋگە بولادى

عالىمدار سۋدى ءىشۋ نورماسىن شامامەن جوعارىداعىداي ەسەپتەدى. ەندىگى قىزىقتىرىپ جۇرگەن ماسەلە: سۋدى قاي ۋاقىتتا ءىشۋ كەرەك؟ تاماقتان كەيىن بە؟ ۇيقىدان ويانعاندا سۋ ءىشۋ دۇرىس پا؟ تۇسكى استان كەيىن سۋ ىشسە نە بولادى؟ كەي بىلگىشتەر اسقا قاراعاندا سۋدى كوپ ءىشىپ تۇرۋ كەرەك، اسقازان ءسولى تەز بولىنەدى دەسە، ەندى ءبىرى اس قورىتىلماي قالادى، كوپ ىشپەگەن دۇرىس دەيدى.

ءبىراق وسى تۋراسىندا وتكىزىلگەن نەشە ءتۇرلى تاجىريبەلەر سۋدىڭ ەشقاشان ارتىق ەتپەيتىنىن دالەلدەگەن. قانشا قالاساڭىز دا ىشە بەرىڭىز. سۋ ءىشۋ مادەنيەتىندە تەك اعزانى مينەرالدى سۋمەن ەمدەۋ كەزىندە عانا شەكتەۋ قويىلادى. دارىگەر ەمدىك مينەرالدى سۋدى ۇسىنىپ، كۇنىنە نەشە ۋاقىت جانە قالاي ءىشۋ كەرەكتىگىن ايتادى.

قۇبىردان اققان سۋدى ىشۋگە بولادى (ءبىراق ىشپەگەن ابزال)

«دەنساۋلىعىم تەمىردەي» دەگەن ادامدار كوزگە قۇددى ءبىر قۇبىردان سۋ ءىشىپ، ەشقاشان اۋىرمايتىن سەكىلدى كورىنەدى. سانيتارلىق نورماعا ساي كەلمەيتىن سۋدى مۇلدەم ىشۋگە بولمايدى. قۇبىردان اققان سۋدىڭ بارلىق تالاپقا ساي ەكەنىن بىلسەڭىز يگى. كەي ەلدەردە قۇبىردان اققان سۋعا ءتىپتى ءتىستى دە جۋعىزبايدى. نە دە بولسا، ارتەرزيان سۋى مەن قۇبىردان اققان سۋدىڭ ايىرماشىلىعى كوپ. مۇمكىندىك بولسا، تازا سۋ ىشكەن دۇرىس.

سۋ ەمدەيدى

ەگەر جۇقپالى اۋرۋعا شالدىقساڭىز، مىندەتتى تۇردە جىلى سۋ ءىشىڭىز. اسىرەسە، وكپە اۋرۋلارى كەزىندە قانجىلىم سۋ كومەكتەسەدى. سەبەبى، كوپ مولشەردەگى جىلى سۋ وكپەدەگى سىلەكەي قابىعىنىڭ قۇرعاماۋىنا جانە قاننىڭ قويۋلانباۋىنا سەپتىگىن تيگىزەدى. ياعني بۇل -  جىلى سۋدىڭ كومەگىمەن ۆيرۋستاردى وكپەدەن تەز جويۋعا بولادى دەگەن ءسوز.

سۋ تىنىشتاندىرادى

مازاسىزدانعان ادامعا نە ءۇشىن ءبىر ستاقان سۋ ۇسىنادى؟ ارينە، ساباسىنا ءتۇسىپ، ەسىن جيناۋ ءۇشىن بەرەدى. تولقىپ تۇرعان ادامعا «تەرەڭ تىنىس ال» دەگەن كەڭەستى تەكتەن-تەك بەرمەيدى. سۋدى دا تەكتەن-تەك ۇسىنبايدى. مازاسى قاشقان ادام سۋ ىشكەندە مي جۇيكە ورتالىقتارىن رەتتەيدى. سۋ ىشكەن كەزدە اقىرىن تىنىستاۋىمىز كەرەك. ىقىلىق اتقاندا دا ادام سۋ ىشەدى. مۇندا دا سۋ جوعارىداعى فۋنكتسيامەن قىزمەت ەتەدى.

ءشول مەن سۋ

ءبىزدىڭ اعزامىزدا اشتىق پەن شولگە جەكە- جەكە جاۋاپ بەرەتىن سەنسورلى مەحانيزم جوق. سول سەبەپتى، ءشول مەن اشتىقتى ءجيى شاتاستىرىپ جاتامىز. ءبىراق اشتىق قاتتى قىسىپ نە ءشول شىداتپاي جاتسا، بۇل ەكەۋىن اجىراتۋ وڭاي. كەيدە نە شولدەپ، نە قارنىڭ اشىپ تۇرعانىن اجىراتا المايسىڭ. ءبىراق، قارىن اشىپ تۇرسا، بىردەن قۋىرداق جەي سالۋ دۇرىس ەمەس. اسقازاندى سۋمەن شايۋ كەرەك، ياعني ءبىر ستاقان سۋ ءىشىپ الۋ قاجەت.

سۋدىڭ جەتىسپەۋشىلىگىنەن...

ءىبىزدىڭ ميىمىزدا %75 سۋ بار. ەگەر ميداعى سۋ %2- عا ازايسا، مي مۇنى بىردەن سەزەدى. كەشكە قاراي ءوز-ءوزىڭىزدى باسقارا الماي، كوزدىڭ الدى قاراۋىتىپ، ۇيقى كەلەدى. بۇل رەتتە بىردەن كوفە ەمەس، سۋ ءىشۋ كەرەك. اعزامەن قوسا مي دا ويانادى. ەڭ دۇرىسى جۇمىس ۇستەلىڭىزگە ءبىر ستاقان سۋ الىپ وتىرىڭىز.