باقىتجان ساعىنتايەۆ: ۇكىمەت 2 ميلليون جاس مامانعا جۇمىس تاۋىپ بەرۋى كەرەك
«ۇكىمەتتىڭ ناقتى جوسپارلارى بار. بولجامعا سايكەس، الداعى 7 جىلدا شامامەن 2 ميلليون جاس مامان - ۋنيۆەرسيتەت پەن كوللەدج تۇلەكتەرى وتاندىق ەڭبەك نارىعىنا شىعادى. ولاردىڭ ءبارىن جۇمىسپەن قامتۋ قاجەت. وسىعان بايلانىستى ءبىز 2025-جىلعا دەيىن 1 ميلليونعا جۋىق جاڭا جۇمىس ورنىن اشۋدى جوسپارلاپ وتىرمىز. ول ءۇشىن جوبالىق باسقارۋ جۇيەسى ەنگىزىلدى. قازىردىڭ وزىندە بازالىق سالالاردا عانا ەمەس، ءوندىرىستى اۆتوماتيزيتسيالاۋ مەن سيفرلاندىرۋ باعىتى بويىنشا جاڭا جۇمىس ورىندارى اشىلىپ جاتىر»، - دەدى ب. ساعىنتايەۆ ەڭبەك نارىعىنىڭ بولاشاعىنا ارنالعان حالىقارالىق فورۋمدا.
ۇكىمەت باسشىسىنىڭ ايتۋىنشا، بۇگىندە ەڭبەك رەسۋرستارىنا بولجام جاساۋدىڭ ۇلتتىق جۇيەسى ەنگىزىلدى. نەگىزگى ماقسات - جۇمىس كۇشىنە دەگەن ۇسىنىس پەن سۇرانىستى زەردەلەۋ. سونىڭ اياسىندا مامانداردى دايارلاۋ جانە قايتا وقىتۋ شارالارى اتقارىلادى.
«2020-جىلعا دەيىن ءبىز شامامەن 550 كاسىپتىك ستاندارتتاردى بەكىتۋدى كوزدەيمىز. اتالعان ستاندارتتار ەكونوميكانىڭ نەگىزگى سالالارىن قامتيتىن بولادى. بۇدان بولەك، ءبىز تەحنولوگيالىق جاڭعىرتۋدىڭ ناتيجەسىندە بوساپ جاتقان كادرلاردى باسقا جەرگە كوشىرۋ تەتىكتەرىن قولعا الدىق. بارلىق ايماقتاردا ءىرى كاسىپورىندارمەن بىرلەسە وتىرىپ، ءتيىستى شارالار اتقارىلىپ جاتىر. بيىلدان باستاپ ەلەكتروندى ەڭبەك بيرجاسى ىسكە قوسىلدى. وعان بارلىق مەملەكەتتىك جانە جەكە مەنشىك جۇمىسپەن قامتۋ ورتالىقتارى اتسالىسىپ كەلەدى. بازادا بوس جۇمىس ورىندارى مەن تۇيىندەمەلەرگە قاتىستى ءبىراز مالىمەتتەر بار. سونىڭ ارقاسىندا جۇمىستى جىلدام تابۋعا بولادى. ال جاپپاي كاسىپكەرلىكتى دامىتۋ باعدارلاماسى اياسىندا 1 ميلليوننان استام ادام جۇمىسپەن قامتىلدى. وسى سالاداعى جۇمىس جالعاسا بەرەدى»، - دەپ اتاپ كورسەتتى ب. ساعىنتايەۆ.