بەلگرادتا قازاقستاندىق تاەكۆوندوشىلار 2 التىن جەڭىپ الدى

استانا. قازاقپارات - سەربيانىڭ بەلگراد قالاسىندا وتكەن تاەكۆوندودان حالىقارالىق تۋرنيردە قازاقستان سپورتشىلارى ەكى التىن، ءبىر قولا مەدال جەڭىپ الدى، دەپ حابارلايدى قازاقپارات.

ق ر ۇلتتىق وليمپيادالىق كوميتەتىنىڭ باسپا ءسوز قىزمەتى حابارلاۋىنشا، ەكى التىنىڭ ءبىرىن ازيا ويىندارىنىڭ كۇمىس جۇلدەگەرى 73 كەلىدە ەل نامىسىن قورعاپ جۇرگەن وتانداسىمىز جانسەل دەنيز جەڭىپ السا، ەكىنشىسىن ازيادانىڭ قولا جۇلدەگەرى 53 كەلىدەگى باق سىنايتىن سپورتشىمىز فاريزا الدوڭعاروۆا قانجىعاسىنا بايلادى. ال قولا مەدالعا 58 كەلىدەگى ايتۋار شايكەنوۆ يە بولدى.

ەسكە سالا كەتەيىك، اتالعان رەيتينگىلىك تۋرنيردەن سوڭ جانسەل دەنيز 108 ۇپايمەن الەمدىك رەيتينگتە 25-ورىندا تۇر. بۇل كورسەتكىش گران-پري تۋرنيرىنىڭ فينالىنا قاتىسۋعا جەتكىلىكسىز.

قازاقستان كومانداسى ساپىنان جەلتوقساندا وتەتىن فينالدىق گران-پري دوداسىنا سمايىل دۇيسەباي عانا قاتىسا الادى. ول ۇزدىك 16 سپورتشىنىڭ تىزىمىنە ەنگەن.

اۆتور: كۇنسۇلتان وتارباي