بەلارۋستە ورماندا جوعالىپ كەتكەن بالانى 2 مىڭنان استام ەرىكتى ىزدەپ جاتىر - فوتو
سۆيسلوچسك اۋدانىنداعى 10 جاسار ماكسيمدى ىزدەستىرۋ جۇمىستارىنا دەمالىس كۇندەرى 2 مىڭنان استام ەرىكتى اتسالىسۋدا.
ەرىكتىلەر بەلارۋستىڭ ءتۇرلى وڭىرلەرىنەن كەلگەن. سونىمەن قاتار، وعان جەرگىلىكتى ميليتسيا، ت ج م ارنايى جاساعى، اۆياتسيا، سۇڭگۋىرلەر، اسكەريلەر، جاقىن اۋدانداردىڭ قورىقشىلارى دا كومەكتەسۋدە.
ولار جاقىن ماڭداعى ورمان ءىشىن، قامىس-باتپاقتى القاپتاردى، يەسىز قالعان حۋتورلاردى ءسۇزىپ شىقتى. بۇل ماڭداعى جىنىس ورمان مەن مي باتپاق ادامداردىڭ كوپتىگىنە قاراماستان ىزدەۋ جۇمىستارىنا قيىنشىلىق تۋدىرۋدا.
ايتا كەتەرلىگى، بالا سۆيسلوچسك اۋدانىنداعى ورماندا 17 -قىركۇيەك كۇنى جوعالىپ كەتكەن. بالانىڭ اناسى ءتارتىپ ساقشىلارىنا ۇلىنىڭ جوعالعانىن ايتىپ ارىزدانعان. ۇل بالا كەشكە ساعات 20.00-دەر شاماسىندا ۆەلوسيپەدىنە ءمىنىپ نوۆىي دۆور دەرەۆنياسىنىڭ جانىنداعى ورمانعا اتتانعان. قازىر، جەرگىلىكتى ءتارتىپ ساقشىلارى ورمان ىشىنەن ۆەلوسيپەدتى تاپتى. 
