استاناداعى قانات يسلامنىڭ ايقاسىنا كانادالىق جانكۇيەرلەر 2 مىڭ بيلەت سۇراتقان

استانا. قازاقپارات - ەكسپو حالىقارالىق كورمەسى اياسىندا ەلوردادا 9 -قىركۇيەك كۇنى وتەتىن قانات يسلام مەن برەندون كۋكتىڭ ايقاسى كانادالىق جانكۇيەرلەرسىز وتپەيدى، دەپ حابارلايدى «قازاقپارات» ح ا ا ءتىلشىسى.

«بىزگە برەندون كۋكتىڭ وكىلدەرى كاسىپقوي بوكس كەشىنە بيلەتتەردىڭ ونلاين-ساتىلىمىن ۇيىمداستىرۋدى سۇراپ، حابارلاستى. كانادالىق تاراپ 2000 بيلەت سۇرادى. ولار استانادا وتەتىن بوكس كەشىنە سپورت جانكۇيەرلەرى مەن اۋەسقويلارى اراسىندا قىزىعۋشىلىقتىڭ جوعارى ەكەندىگىنە سەندىرۋدە»، - دەپ ايتتى قازاقستانداعى Nelson promoutions وكىلى نۇرعازى يسماعامبەتوۆ.

ول مادەنيەت جانە سپورت مينيسترلىگى، استانا اكىمدىگى، «سامۇرىق- قازىنا»، سونداي-اق «استانا- ەكسپو-2017» ۇ ك- نىڭ دەمەۋشىلىگىمەن ءىس-شارانىڭ جوعارى دەڭگەيدە ۇيىمداستىرىلاتىنىن اتاپ ءوتتى.

«قازىردىڭ وزىندە وسىنداي اۋقىمدى بوكس شاراسىنا دايىندىق جۇمىستارى جۇرگىزىلۋدە. يسلام مەن كۋك اراسىنداعى باستى جەكپە- جەكتەن بولەك، قازاقستاندىق جانە شەتەلدىك جانكۇيەرلەر جانقوش تۇراروۆ، مەيىرىم نۇرسۇلتانوۆ، ءالي احمەدوۆ، جانىبەك ءالىمحان ۇلى، رۋسلان مىرساتايەۆ، نۇرسۇلتان جانايبايەۆ، ايدوس ەربوسىن ۇلى جانە ديماش نيازوۆ سياقتى تانىمال بىلعارى قولعاپ شەبەرلەرىنىڭ تاماشا بوكسىن تاماشالاي الادى»، - دەپ اتاپ ءوتتى يسماعامبەتوۆ.

ەسكە سالايىق، 9 -قىركۇيەك كۇنى ەلوردالىق «سارى ارقا» ۆەلوترەگىندە كاسىپقوي بوكس كەشى وتەدى. باستى جەكپە-جەكتە قانات يسلام كانادالىق برەندون كۋكپەن جەكپە-جەكتە ءوز تيتۋلدارىن قورعايدى.