وزبەكستان مەن تۇركيا قۇنى 2 ميلليارد دوللار بولاتىن كەلىسىم جاسادى
بۇل تۋرالى بەيسەنبى كۇنى ساۋدا-ەكونوميكالىق ىنتىماقتاستىق جانە وزبەك-تۇرىك بيزنەس- فورۋمى جونىندەگى ۇكىمەتارالىق كوميسسيانىڭ ءتورتىنشى وتىرىسىن قورىتىندىلاعان وزبەكستان پرەمەر-ءمينيسترىنىڭ ورىنباسارى رۋستام ازيموۆ حابارلادى، دەپ جازدى gazeta.uz.
ەكىجاقتى قۇجاتتار تۋريزم، توقىما، ەلەكتروتەحنيكا، فارماتسيەۆتيكا، قۇرىلىس جانە بانك سالالارى جوبالارىن جۇزەگە اسىرۋدى قاراستىرادى.
2016-جىلدىڭ ناتيجەسى بويىنشا ءوزارا تاۋار اينالىمى 1,2 ميلليارد دوللاردى قۇراعان، ونىڭ 709 ميلليون دوللارى وزبەكستاننان تۇركياعا جاسالعان ەكسپورت كورسەتكىشى. بيىلعى جىلى تاۋار اينالىمىن 1,4 ميلليارد دوللارعا دەيىن ارتتىرۋ ماقساتى كوزدەلىپ وتىر.
وزبەكستان پرەمەر-ءمينيسترى تىكەلەي كولىك بايلانىسىنىڭ جاقسارىپ كەلە جاتقاندىعىنىڭ جانە ونىڭ وتە ماڭىزدى ەكەندىگىن اتاپ ءوتتى. «جىل سوڭىنداعى باكۋ - تبيليسي - كارس باعىتىنداعى تەمىرجولدىڭ اشىلۋى وزبەكستان مەن تۇركيا اراسىنداعى ساۋدا-ەكونوميكالىق بايلانىستىڭ دامۋىنا بەرىك نەگىز بولادى»، - دەدى ول.
سونداي-اق، ءوزارا سەرىكتەستىكتىڭ باستى باعىتتارىنىڭ ءبىرى - تۋريزم سالاسى. وزبەكستاننىڭ تاريحي قالالارىنداعى زاماناۋي قوناق ءۇي كەشەندەرنىڭ قۇرىلىسى، تۋريزم ينفراقۇرىلىمدارى جانە وسى سالا ماماندارىن دايارلاۋ بويىنشا تۇرىك كومپانيالارىمەن كەلىسىمدەر جاسالدى. تۇركيانىڭ ەكونوميكا ءمينيسترى نيحات زايبەكچي وزبەك ارىپتەستەردەن تۇركيا ازاماتتارى ءۇشىن ۆيزا ءتارتىبىن جەڭىلدەتۋىن سۇرادى.