مەملەكەت باسشىسى ج. بارروزۋدى 2- دارەجەلى «دوستىق» وردەنىمەن ماراپاتتادى
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەت باسشىسى قازاقستان مەن ەۋروپالىق وداق اراسىنداعى ءوزارا قارىم- قاتىناستى نىعايتۋعا قوسقان ەلەۋلى ۇلەسى ءۇشىن ج. بارروزۋعا العىس ايتتى.
«ەۋروپالىق كوميسسياعا ءسىز ءتوراعالىق ەتكەن كەزدە قازاقستان مەن ەۋرووداق اراسىنداعى تاۋار اينالىمى ون ەسە ارتتى. ءسىزدىڭ پارمەندى ىقپالىڭىز، دوستىق كومەگىڭىز ارقىلى ءبىز ق ر مەن ە و- نىڭ كەڭەيتىلگەن سەرىكتەستىگى جانە ىنتىماقتاستىعى تۋرالى كەلىسىم جوباسىنا قاتىستى كەلىسسوزدەر اياقتالعانى جونىندەگى قۇجاتقا قول قويدىق. ەۋروپالىق وداق ءبىزدىڭ نەگىزگى ساۋدا سەرىكتەسىمىز بولىپ قالا بەرمەك»، - دەدى قازاقستان پرەزيدەنتى.
ج. بارروزۋ ءوز قىزمەتىنە جوعارى باعا بەرگەنى ءۇشىن نۇرسۇلتان نازاربايەۆقا ريزاشىلىق ءبىلدىرىپ، قازاقستان مەن ەۋرووداق اراسىنداعى سەرىكتەستىك بۇدان ءارى ورىستەپ، ونىڭ اياسى كەڭەيە بەرەدى دەپ ۇمىتتەنەتىنىن جەتكىزدى.
«ەۋروپالىق كوميسسيانىڭ ءتوراعاسى رەتىندە مەن قازاقستان مەن ەۋرووداق اراسىنداعى تىعىز سەرىكتەستىكتى قولداۋ ءۇشىن قاجەت بولعان بار كۇش- جىگەرىمدى سالدىم جانە ءوزىمنىڭ وعان قوسقان ۇلەسىمدى زور ماقتانىش تۇتام. سونداي قارىم- قاتىناس ورناتۋ ءۇشىن ءسىزدىڭ تىكەلەي اتسالىسۋىڭىز دا وتە ماڭىزدى بولدى»، - دەدى ەۋروپالىق كوميسسيانىڭ بۇرىنعى ءتوراعاسى.
كەزدەسۋ بارىسىندا مەملەكەت باسشىسى حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن ج. بارروزۋدى II دارەجەلى «دوستىق» وردەنىمەن ماراپاتتادى.
