سالىنعان سوڭ 2 عاسىردان كەيىن عانا حالىق يگىلىگىن كورە باستاعان شىمكەنتتەگى ءدارى زاۋىتىنىڭ تاريحى
بۇكىل دۇنيە جۇزىندەگى فارماتسيەۆتيكالىق كاسىپورىنداردىڭ ەڭ بايىرعىلارىنىڭ ءبىرى ءارى بىرەگەيى بولىپ سانالادى. زاۋىتتىڭ نەگىزىن 1882 - جىلى ورىس كوپەستەرى يۆانوۆ پەن ساۆينكوۆ قالاعان.
مۇنداي كاسىپورىننىڭ پايدا بولۋىنا قازاق جەرىندەگى، ونىڭ ىشىندە وڭتۇستىك قازاقستانداعى داڭقتى دەرمەنە تىكەلەي سەبەپكەر بولعان.
سوناۋ 1885 - جىلى تۇركىستان ولكەسىندەگى دەرمەنە كاسىپورنى ءوزىنىڭ ەڭ العاشقى ءونىمى - 189 پۇت سانتونين شىعارادى. رەسەيدە بۇل ءونىمنىڭ 2-3 پۇتى عانا پايدالانىلىپ، قالعانى تۇگەلدەي شەتەلگە شىعارىلادى.
1918 - جىلعى 15 - مامىردا تۇركىستان رەسپۋبليكاسى حالىق كوميسسارلارى كەڭەسىنىڭ بۇيرىعىمەن زاۋىت ناتسيوناليزاتسيالاندى. 1921 - جىلدىڭ 22 - قاراشاسىندا ۆ. ي. لەنين قول قويعان «شىمكەنت سانتونين زاۆودىن باسقارۋدى ۇيىمداستىرۋ تۋرالى» دەكرەت بويىنشا تۇركىستان رەسپۋبليكاسى حالىق شارۋاشىلىعى كەڭەسىنەن ر ك ف س ر حالىق شارۋاشىلىعى كەڭەسىنە بەرىلەدى.
دەرمەنە وسىمدىگى مەملەكەتتىك مونوپوليا يەلىگىنە اينالدىرىلادى. 1925 - جىلى 3 - ماۋسىمدا شىمكەنت سانتونين زاۋىتى ءبىرىنشى مەملەكەتتىك حيميا-فارماتسيەۆتيكا زاۋىتى بولىپ قايتا قۇرىلادى. 1923-1929 - جىلدارى ك س ر و-دا تۇڭعىش رەت نيكوتين ءوندىرۋدى، 1931 - جىلى انابازين سۋلفاتىن ءوندىرۋدى، كەيىنىرەكتە ديوسپونين، پوليسپونين، سيتيزين سياقتى جاڭا پرەپاراتتار جاساۋدى يگەرەدى.
وتكەن عاسىردىڭ جەتپىسىنشى جىلدارى زاۋىت مەديتسينا پرەپاراتتارىنىڭ 30 عا جۋىق تۇرلەرىن شىعارۋعا قول جەتكىزدى. وكىنىشكە قاراي، وسىنداي بىرەگەي كاسىپورىننىڭ ونىمدەرى تۇگەلدەي رەسەيگە، بەلارۋسقا، ۋكرايناعا، بالتىق بويى رەسپۋبليكالارىنا، سونداي-اق، بولگاريا، فرانسيا، موڭعوليا، كۋبا سياقتى ەلدەرگە جىبەرىلىپ، قازاقستاننىڭ ءوزى، جەرگىلىكتى حالىق ونىڭ يگىلىگىن كورمەدى. شىمكەنت سانتونينى جاقىن جانە الىس شەتەلدەرگە جونەلتىلىپ، پرەپاراتتار سول جاقتاردا جاسالاتىن.
وسىلايشا ءبىر عاسىر بويى جەرگىلىكتى جۇرتشىلىق شىمكەنتتەگى وسى زاۋىتتىڭ نەمەن اينالىساتىنىن دا، قانشاما قىرۋار بايلىقتىڭ شەتكە كەتىپ جاتقانىن دا بىلمەدى. تەك تاۋەلسىزدىك العاننان كەيىن عانا قازاقستاندا وزىندىك فارماتسيەۆتيكالىق ءوندىرىستى يگەرىپ، يگىلىككە جاراتۋعا شىنايى بەتبۇرىس جاسالا باستادى.
1993 - جىلى «حيم فارم» ا ق قۇرىلدى. كەيىننەن دايىن دارىلىك ونىمدەر شىعارۋ قولعا الىندى. شەتەلدىك ارىپتەستەرمەن ىنتىماقتاسا ىقپالداسۋ زاماناۋي جابدىقتاردى يگەرۋگە مۇمكىندىك تۋعىزدى.
باسقارۋدىڭ عىلىمي جۇيەسىنە كوشۋ، كاسىبي شەبەرلىكتى الدىڭعى ورىنعا شىعارۋ، جوعارى تەحنولوگيالاردى مەڭگەرۋ - مىنە، مۇنىڭ ءبارى دە شىمكەنت حيميا-فارماتسيەۆتيكا زاۋىتىن قىسقا مەرزىمدە ايتارلىقتاي العا باستىردى. وسىلايشا باستاۋىش سۋبستانتسيالار وندىرۋمەن شەكتەلەتىن كاسىپورىن SANTO ساۋدا ماركالى حالىقارالىق ستاندارتقا ساي كەلەتىن دايىن دارىلىك دۇنيەلەر شىعاراتىن زاماناۋي زاۋىتقا اينالدى.
بۇگىندە ءبىزدىڭ زاۋىت ىستىق تۇسىرەتىن ءدارى-دارمەكتەر، انتاتسيدتەر، اسقازان جاراسىن ەمدەۋگە قاجەتتى، ءوت ايدايتىن پرەپاراتتار، ديارەياعا، ۆيرۋستارعا، جوتەلگە، سۋىقتاۋعا قارسى پرەپاراتتار، جۇيكەنى تىنىشتاندىراتىن، تەرىنى جانە جاراقاتتاردى دەزينفەكتسيالايتىن دۇنيەلەر شىعارادى. سونداي- اق، فارماتسيەۆتيكالىق تۇنبالار، پارافارماتسيەۆتيكالىق، تاماقتانۋعا قوسىمشا قوسپالار، ۋرولوگيا، دەرماتولوگيا، گينەكولوگيا جانە اكۋشەرلىك، ەندوكرينولوگيا، يممۋنولوگيا سالالارىنا قاجەتتى، تاعى باسقا دا تولىپ جاتقان ءدارى-دارمەكتەر ازىرلەيدى.
زاۋىتتىڭ باستى ينۆەستورى - «پولفارما» حالىقارالىق فارماتسيەۆتيكالىق توبى. پولياك ينۆەستورلارى قازىرگى «حيم فارم» اق ءۇشىن ءوزارا ارىپتەستىك تابىستاردىڭ، جەڭىستەر مەن جەمىستەردىڭ قاينار كوزى بولىپ تابىلادى. زاۋىتتىڭ كوپتەگەن قىزمەتكەرلەرى پولشادا ارنايى دايارلىقتان وتەدى. جاڭاشا قۇرىلىستار سالىنىپ، جاڭاشا جابدىقتار كوپتەپ الىنۋدا.
2013 - جىلدان بەرى كاسىپورىن تولىق قۋاتىندا جۇمىس ىستەي باستادى. ينەكتسيالىق ەرىتىندىلەر، ونكولوگيالىق جانە بيوتەحنولوگيالىق پرەپاراتتار شىعارىلادى. جاڭا تسەحتىڭ پايدالانۋعا بەرىلۋى قوسىمشا 400 ادامدى جۇمىسپەن قامتۋعا مۇمكىندىك بەرىپ وتىر.
ۇستىمىزدەگى جىلعى قازان ايىندا شىمكەنتتە حالىقارالىق عىلىمي- تاجىريبەلىك كونفەرەنتسيا ءوتتى. وسى باسقوسۋدىڭ بارىسىندا «حيم فارم» ا ق پەن Santo Member of Polpharma Group جانە وڭتۇستىك قازاقستان مەملەكەتتىك فارماتسيەۆتيكا اكادەمياسى اراسىندا ارنايى مەموراندۋمعا قول قويىلدى. بۇل دا ءبىزدىڭ زاۋىتتىڭ وركەندەپ، ءوسۋى جانە ونىمدەرىن مولايتا ءتۇسۋى ءۇشىن ۇلكەن سەرپىلىس تۋدىرادى.
Santo Member of Polpharma Group كومپانياسى - «حيم فارم» ا ق ساۋدا ماركاسى. بۇل كومپانيا قازاقستان مەن ورتالىق ازيا ءۇشىن جوعارى ساپالى، قولجەتىمدى ءدارى-دارمەكتەر ءوندىرىپ، رىنوكقا شىعارادى. كومپانيانىڭ وندىرىستىك قۋاتى وتە جوعارى. جىلىنا 1 ميلليارد تابلەتكا، كاپسۋل جانە تۇيىرشىكتەر، 350 ميلليون امپۋلا، 24 ميلليون قۇتى انتيبيوتيكتەر، 4 ميلليون پاكەت ينفۋزيالار وندىرەدى. وسىنىڭ ناتيجەسىندە ءقازىر شىمكەنتتە جانە قازاقستان رەسپۋبليكاسىنىڭ بارلىق وڭىرلەرىندە 1300 ادام جۇمىسپەن قامتىلعان.
ينۆەستيتسيا يگىلىگى وسىلايشا حالىق مۇددەسىنە جۇمسالۋدا.
(ماقالا «ەگەمەن قازاقستان» گازەتىنەن الىندى)
ارسلان شاحين، «حيم فارم» ا ق باس ديرەكتورى.
