قازاقستاندا 2 مىڭ توننا بالانستىق التىن قورى بار

استانا. قازاقپارات - بۇگىن 5- حالىقارالىق تاۋ- كەن مەتاللۋرگيا كونگرەسىندە ق ر يندۋستيا جانە جاڭا تەحنولوگيالار مينيسترلىگى گەولوگيا جانە جەر قويناۋىن پايدالانۋ كوميتەتىنىڭ ءتوراعاسى بازارباي نۇرابايەۆ قازاقستانداعى پايدالى قازبالاردىڭ كولەمى جايىندا ايتىپ بەردى.

«قازاقستاندا مەملەكەتتىك بالانستاردا مينەرالدىق شيكىزاتتىڭ 102 ءتۇرى بويىنشا پايدالى قازبالاردىڭ قورى ەسەپتەلەدى، ونىڭ ىشىندە قاتتى پايدالى قازبالاردىڭ 40 ءتۇرى بار» ، - دەدى ول.

 ونىڭ سوزىنە قاراعاندا، ەلىمىزدە التىننىڭ بالانستىق قورى 2 مىڭ توننانى قۇراپ، ونىڭ ىشىندە كەن ورىندارىنىڭ 76 پايىزى پايدالانىلۋدا، 19 پايىز بولىگىندە بارلاۋ جۇرگىزىلۋدە، ال 5 پايىزى پايدالانىلماي، جابىق تۇر. مەملەكەتتىك بالانستا التىن كەن ورىندارىنىڭ 321 نىسانى تىركەلگەن. سونداعى 92 نىسان يگەرىلۋدە، 120 نىساندا بارلاۋ جۇمىستارى جۇرگىزىلۋدە، سونداي- اق 110 نىسان قور رەتىندە ساقتالۋدا.

بۇدان بولەك، مىستىڭ بالانستىق قورى 38 ميلليون توننا، قورعاسىن - 17 ميلليون، مىرىش - 36 ميلليون، بوكسيتتەر - 345 ميلليون،  حرومدى كەن - 369 ميلليون، تەمىر كەنى - 19 ميلليارد توننا، مارگانەتس كەنىنىڭ قورى 688 ميلليون توننانى قامتىپ وتىر.

اۆتور: رۋسلان عابباسوۆ