قازاقستان حالقىنىڭ سانى 28 ميلليونعا قاشان جەتۋى مۇمكىن؟

استانا. قازاقپارات - قازاقستان حالقىنىڭ ورتاشا جىلدىق سانى 2050 -جىلعا قاراي 8,2 ميلليون ادامعا ءوسىپ، 27,8 ميلليون ادامعا جەتۋى مۇمكىن، - دەپ حابارلايدى ەڭبەك رەسۋرستارىن دامىتۋ ورتالىعىنىڭ باسپا ءسوز قىزمەتى.

ورتالىق مالىمەتىنشە، 2022-2050 -جىلدارى جاڭا تۋعان نارەستەلەر سانى 14,3 ميلليون ادام، قايتىس بولعاندار سانى 5,5 ميلليون ادام بولادى. وسىلايشا، تابيعي ءوسىم 8,8 ميلليون ادام بولادى. الايدا كوشى- قوننىڭ تەرىس سالدوسىنا بايلانىستى (565 مىڭ ادام) 2050 -جىلعا قاراي حالىقتىڭ تازا ءوسىمى 8,2 ميلليون ادام بولادى.

2050 -جىلعا قاراي سەگىز ءوڭىردىڭ حالىق سانى 869 مىڭ ادامعا قىسقارۋى مۇمكىن، ولاردىڭ قاتارىنا اباي (92 مىڭعا)، اقمولا (80 مىڭعا)، قاراعاندى (99 مىڭعا)، قوستاناي (181 مىڭعا)، پاۆلودار (100 مىڭعا)، سولتۇستىك قازاقستان (182 مىڭعا)، ۇلىتاۋ (15 مىڭعا)، شىعىس قازاقستان (120 مىڭعا) وبلىستارى كىرەدى.

سونىمەن قاتار، قالعان وڭىرلەردەگى حالىق سانى 9 ميلليون ادامعا ءوسۋى مۇمكىن، ونىڭ ىشىندە استانا، الماتى جانە شىمكەنت قالالارىندا 4,2 ميلليون ادامعا دەيىن وسەدى. حالىق سانى مىنا وبلىستاردا وسەدى: اقتوبە (326 مىڭ)، الماتى (800 مىڭ)، اتىراۋ (350 مىڭ)، باتىس قازاقستان (112 مىڭ)، جامبىل (657 مىڭ)، جەتىسۋ (512 مىڭ)، قىزىلوردا (328 مىڭ)، ماڭعىستاۋ (723 مىڭ) جانە تۇركىستان (994 مىڭ ادامعا).

2022-2050 -جىلدارى 13,6-دان 16,3 ميلليونعا دەيىن (بازالىق سەناريدە 14,3 ميلليون) بالا دۇنيەگە كەلەدى دەپ كۇتىلىپ وتىر، ونىڭ 64 پايىزى - قالالىق جەرلەردە، 36 پايىزى - اۋىلدىق جەرلەردە.

ماسساگەت