الماتى فونتانىندا توق سوعۋ وقيعاسى: 28 جاستاعى ناۋقاستىڭ جاعدايى اۋىر

الماتى. قازاقپارات - الماتى سيركىنىڭ جانىنداعى سۋبۇرقاقتا توق سوققان ءۇش ادامنىڭ بىرەۋىنىڭ جاعدايى ءالى دە وتە اۋىر.

بۇل تۋرالى الماتى قالالىق قوعامدىق دەنساۋلىق باسقارماسى ءمالىم ەتتى، دەپ حابارلايدى قازاقپارات ءتىلشىسى.

«ناۋقاستىڭ جاعدايى اۋىر، جانساقتاۋ بولىمىندە جاتىر. جاساندى تىنىس الۋ اپپاراتىنان الىندى. قازىر ءوزى دەمالىپ جاتىر. 8 جانە 10 جاسار قىزدار اۋرۋحانانىڭ بەيىندى بولىمىندە جاتىر. ەكەۋىنىڭ دە جاعدايى تۇراقتى، شاعىم جوق، بارلىق مەديتسينالىق كومەكتى الۋدا»، - دەپ حابارلادى الماتى قالالىق قوعامدىق دەنساۋلىق ساقتاۋ باسقارماسىنان.

ەسكە سالا كەتەيىك، 19 -ماۋسىم كۇنى الماتى سيركى ماڭىنداعى فونتاندا بىرنەشە ادامدى توق سوقتى. كەيىننەن اكىمدىك اتالعان وقيعانىن ءمان- جايىن ءتۇسىندىردى.

سونىمەن قاتار، «Eco Almaty» ج ش س باسشىسى جاننا اسانوۆا، ول جەردە «شومىلۋعا تىيىم سالىنادى!» دەگەن ەسكەرتۋ تاقتاشاسى ورناتىلعانىن اتاپ ءوتتى. الماتى اكىمى وقىس وقيعاعا قاتىستى پوليتسيا تەرگەۋ جۇرگىزىپ جاتقانىن ءمالىم ەتتى.

اۆتور: الما مۇقانوۆا