قازاقستان بويىنشا بالالاردىڭ 28 پايىزى شالدىققان اۋرۋ - تاعام تانۋ اكادەمياسى
بۇل تۋرالى بۇگىن استانا قالالىق ءبىلىم باسقارماسى مەن «نەستلە فۋد قازاقستان» كومپانياسى بىرگە قولعا العان «سالاۋاتتى تاماقتانۋ مەكتەبى» جوباسىنا ارنالعان باسپا ءسوز ءماسليحاتى بارىسىندا مەديتسينا عىلىمدارىنىڭ دوكتورى، قازاق تاعامتانۋ اكادەمياسى تاماق تانۋ پروبلەمالارى ينستيتۋتىنىڭ ديرەكتورى ەربولات دالەنوۆ ءمالىم ەتتى.
«جالپى، دەنساۋلىقتى ساقتاۋ ءۇشىن ەڭ ءبىرىنشى دۇرىس تاماقتانۋ كەرەك، سونىمەن قاتار، بالاعا فيزيكالىق سالماق ءتۇسۋى كەرەك. قازىر بالالار دۇرىس تاماقتانبايدى، ولارعا ءتاتتىنى كوپ بەرەمىز. مەكتەپتە ءتاتتى تاماقتاردى، مىسالى، شوكولاد پەن گازدالعان سۋسىنداردى ساتۋعا تىيىم سالساق تا، ساباقتان شىققاننان كەيىن ءبارىبىر گازدالعان سۋ ءىشىپ، ءتاتتى جەيدى. كەشكە ۇيگە كەلگەن بالانى اتا-اناسى تويىدىرىپ تاماقتاندىرادى. ال ادام اعزاسى وتە «اقىلدى»، بالا كۇنى بويى دۇرىس تاماق ىشپەي، ۇيىنە بارىپ تويىپ تاماقتانعاندا، اعزاسى اۆتوماتتى تۇردە ماي جيناي باستايدى، سەبەبى، ەرتەڭ تاعى كۇندىز بويى اعزا دۇرىس تاماقتانبايدى دەپ ويلايدى. وسىلايشا، ماي قورلارى جينالا باستايدى. بۇنى عىلىمي تۇردە زەرتتەپ، اتا- انالار مەن وقۋشىلارعا ايتىپ ءجۇرمىز» - دەيدى ە. دالەنوۆ.
ە. دالەنوۆ ەلىمىز بويىنشا ارتىق سالماعى بار بالالاردىڭ كوبەيىپ بارا جاتقانىنا الاڭدايدى.
«قازاقستان بويىنشا ارتىق سالماعى بار بالالاردىڭ سانى جىلدان جىلعا كوبەيىپ كەلەدى. سوڭعى بەس جىلدا كەيبىر وڭىرلەردە ارتىق سالماعى بار بالالاردىڭ سانى ەكى ەسەگە ارتقان. نەگىزى، قازاقستان بويىنشا بالالاردىڭ 28 پايىزىندا، ال كەيبىر وڭىرلەردە 33 پايىزىندا ارتىق سالماق كەزدەسەدى. ارتىق سالماق دەنساۋلىقتى بۇزادى، ەگەر بالا ارتىق سالماقتان ارىلماسا، بولاشاقتا قانت ديابەتىنە شالدىعۋى مۇمكىن»، - دەيدى تاعامتانۋ مامانى.
