ناۋرىزدىڭ 28- كۇنى استانادا «جەر ساعاتى» اكسياسى وتەدى
الەمنىڭ ءتۇرلى ەلدەرىندەگى ادامدار كليماتتىڭ وزگەرۋىمەن كۇرەس يدەياسىنا قولداۋ كورسەتۋ ءۇشىن ءبىر ساعاتقا جارىقتى سوندىرەدى. «حان شاتىر» ساۋدا ويىن-ساۋىق ورتالىعىندا ساعات 19:30-21:30 ارالىعىندا «جەر ساعاتىنا» ارنالعان فلەشموب وتەدى.
بيىل «جەر ساعاتى-2015» اكسياسى «ۇلتتىق اعاش وتىرعىزۋ كۇنى» اياسىندا ۇيىمداستىرىلادى. ونىڭ ماقساتى - ورمانداردى قالپىنا كەلتىرۋ، قالالاردى كوگالداندىرۋ، قازاقستاننىڭ ورمان بايلىعىن ساقتاپ، كوبەيتۋدەگى قوعام مۇددەسىن دامىتۋ، ورماندى قالپىنا كەلتىرۋ جوبالارىنا رەسۋرستار تارتۋ. بىلتىر اكسيا الەمنىڭ 160 تان استام مەملەكەتىندە 2 ميللياردقا جۋىق ادامدى قامتىعان بولاتىن. ساعات 20:30-دا BIG BEN، سيدنەي وپەرا تەاترى، ىستامبۇلداعى كوك مەشىت، افيناداعى اكروپول، ۆاتيكانداعى اۋليە پەتر شىركەۋى، پاريجدەگى ەيفەل مۇناراسى، نيۋ-يوركتەگى Empire State Building جانە Times Square, نياگارا سارقىراماسى، لوس-اندجەلەس حالىقارالىق اۋەجايى، الماتىداعى كوكتوبە تەلەمۇناراسى، «حان شاتىر» س و و، «بايتەرەك» مونۋمەنتى جانە «اقوردا» پرەزيدەنت رەزيدەنتسياسى سەكىلدى الەمنىڭ كورنەكتى جەرلەرىندە جارىق ءسوندىرىلدى.
سونداي-اق 28- ناۋرىز كۇنى ساعات 20:30-دا «ۇلتتىق اكادەميالىق كىتاپحانا»، «ترانسپورت تاۋەر» اكىمشىلىك-تەحنولوگيالىق كەشەنى، «استانا وپەرا» تەاترى جانە ەسىلدىڭ سول جاعالاۋىنداعى بارلىق ارحيتەكتۋرالىق انسامبلدەردە جارىق وشىرىلەدى. بارلىق استانالىقتاردىڭ «حان شاتىر» س و و وتەتىن «جەر ساعاتى» رەسپۋبليكالىق فلەشموبىنا قاتىسۋىنا بولادى. شارا بارىسىندا «تۋعان جەر» تاقىرىبىندا فوتو كورمە وتكىزىلىپ، ساراپشىلار ە ك و-ادەتتەر، ە ك و- باستامالار بويىنشا باياندامالار جاسايدى، ە ك و- سايىستار ۇيىمداستىرىلىپ، جاندى ە ت ن و- مۋزىكا ورىندالادى.
«جەر ساعاتى» - دۇنيەجۇزىلىك جابايى تابيعات قورىنىڭ جاھاندىق اكسياسى (WWF). بۇل - تابيعاتتى ايالاۋدىڭ، عالامشارىمىزدىڭ شەكتەۋلى رەسۋرستارىنا دەگەن قامقورلىقتىڭ سيمۆولى. «جەر ساعاتى» اكسياسى اياسىندا الەمنىڭ ءاربىر ەلىندە ادامدار ءبىر ساعاتقا ەلەكتر جارىعىن ءوشىرىپ، سول ارقىلى كليماتتىڭ وزگەرۋىمەن كۇرەس يدەياسىن قولدايتىندىقتارىن بىلدىرەدى.
