امەريكالىق ستۋدەنتتەر 280 دوللارعا ساتىپ الاتىن وقۋلىقتى قازاقستاندىقتار تەگىن وقيدى

استانا. قازاقپارات - امەريكالىق ستۋدەنتتەر 280 دوللارعا ساتىپ الاتىن وقۋلىقتى قازاقستاندار تەگىن وقيدى. بۇل تۋرالى بۇگىن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا جارىق كورگەن وقۋلىقتاردى ەلباسى نۇرسۇلتان نازاربايەۆقا تانىستىرۋ بارىسىندا ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى ايتتى، دەپ حابارلايدى قازاقپارات.

«بۇل دەڭگەيدەگى ءبىر وقۋلىقتى قۇراستىرىپ، باسۋعا دايىنداۋ قۇنى 500 مىڭنان 3 ميلليون دوللارعا دەيىن جەتەدى. سوندىقتان دا وقۋلىقتاردىڭ باعاسى ادەتتە وتە جوعارى. مىسالى، ءبىز اۋدارعان پروفەسسور مەنكيۋدىڭ «ەكونوميكس» اتتى وقۋلىعىن امەريكالىق ستۋدەنتتەر 280 دوللارعا ساتىپ الادى. ونىڭ ۇستىنە وقۋلىقتى وزگە تىلگە اۋدارىپ، باسۋعا دا اۆتورلار قاتاڭ باقىلاۋ جاسايدى»، - دەپ اتاپ ءوتتى ول.

ونىڭ ايتۋىنشا، اتالعان جايتتى ەسكەرە وتىرىپ اۋدارما جۇمىسىنا ەلىمىزدەگى ىرگەلى وقۋ ورىندارى، گۋمانيتارلىق باعىتتاعى عىلىمي-زەرتتەۋ ورتالىقتارىنىڭ ماماندارىن كەڭىنەن تارتۋعا كۇش سالىنعان. اۋدارمانى مەيلىنشە ساپالى شىعارۋ ءۇشىن جۇمىسقا تاجىريبەلى اۋدارماشىلار مەن جوعارى وقۋ ورىندارىنىڭ ۇستازدارى شاقىرىلىپ، عىلىمي رەداكسيا جاساۋعا ەلىمىزدىڭ بەلگىلى عالىمدارى، ادەبي رەداكسياعا قارىمدى قالامگەرلەر، بىلىكتى رەداكتورلار مەن باسپاگەرلەر تارتىلعان.

«قازىر بۇل جۇمىسقا 200 گە تارتا مامان قاتىسۋدا. سونداي-اق، عىلىمي اۋدارماسى جولعا قويىلعان ەلدەردىڭ تاجىريبەسى مۇقيات زەرتتەلدى. ىرگەلى اۋدارما تەحنولوگياسىنىڭ ءبىرى دۇنيەجۇزىنىڭ 181 مىڭنان اسا اۋدارماشىسى قولداناتىن ارنايى تۇعىرناما ۇسىنىلدى»، - دەدى راۋان كەنجەحان ۇلى.

ايتا كەتەيىك، استاناداعى نازاربايەۆ ورتالىعىندا «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتاردىڭ تانىستىرىلىمى ءوتىپ جاتىر. سالتاناتتى شاراعا ق ر پرەزيدەنتى نۇرسۇلتان نازاربايەۆ قاتىسۋدا.

جيىندا ءسوز سويلەگەن ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى قازاق تىلىنە اۋدارىلعان 18 وقۋلىقتىڭ جالپى تارالىمى 47 ميلليوننان اساتىندىعىن ايتتى.