قازاقپارات كۇنتىزبەسى: 27- قاراشا
ەستە قالار وقيعالار
1963-جىلى «اۋەزوۆ ءۇيى» عىلىمي-مادەني ورتالىعى اشىلدى. ول ۇلى جازۋشى م. اۋەزوۆتىڭ ءومىرى مەن شىعارماشىلىعىن كوپشىلىككە تانىستىرۋ، ناسيحاتتاۋ، زەرتتەۋ جۇمىستارىمەن اينالىسادى. ورتالىق 1951-1961-جىلدارى الماتىدا جازۋشىنىڭ ءوزى تۇرعان تولەبايەۆ كوشەسىندەگى 155№ ۇيدە ورنالاسقان. ورتالىق نەگىزىنەن، ءۇش باعىتتا جۇمىس جۇرگىزەدى: ءبىرىنشى باعىتى - جازۋشىنىڭ ءومىرى مەن شىعارماشىلىعى مۇراسىن جيناقتاۋ، ونى عىلىمي جۇيەگە ءتۇسىرىپ سارالاۋ، جاريالاۋ جانە اۋەزوۆتانۋ سالاسى بويىنشا جارىق كورگەن ەڭبەكتەردى جيناۋ. ەكىنشى باعىتى - مۇراجايداعى قولجازبالار مەن ەكسپوناتتاردى، كينو، فوتو، دىبىس قورلارىنداعى مۇرالاردى عىلىمي جۇيەگە ءتۇسىرۋ، كورمە ۇيىمداستىرۋ. قولجازبا قورىندا 72 مىڭنان استام مۇراعات، سيرەك كەزدەسەتىن كىتاپتار، جازۋشىنىڭ كۇندەلىكتەرى مەن جولجازبالارى، مۇراعاتتاردان جيناعان قۇندى دەرەكتەر، جەكە قۇجاتتارى، ت. ب. بار.
199 -جىلى الماتى وبلىسىنىڭ جامبىل اۋدانىندا قاراساي باتىر اتىنداعى قور مەن تاريحي-ەتنوگرافيالىق قوعام قۇرىلدى.
1992-جىلى الماتى وبلىسىنىڭ نارىنقول اۋدانى قاراساز اۋىلىندا اقىن مۇقاعالي ماقاتايەۆتىڭ مۋزەيى اشىلدى.
2007-جىلى پاريجدە قازاقستاننىڭ حالىقارالىق سوت ورىنداۋشىلارى وداعىنا (ح س و و) مۇشە رەتىندە كىرۋ ءراسىمى ءوتتى. ح س و و - سوت شەشىمدەرىن ماجبۇرلەپ ورىنداتۋمەن اينالىساتىن كاسىبيلەردىڭ حالىقارالىق بىرلەستىگى. وداق ەۋرووداقتىڭ، گااگا كونۆەنتسياسىنىڭ، بۇۇ كوميتەتىنىڭ مۇشەسى، ونىڭ قاتارىندا الەمدەگى 60 تان استام ەلدىڭ وكىلدەرى بار. وداقتىڭ باستى مىندەتى بارلىق ەلدەردىڭ سوت ورىنداۋشىلارى اراسىندا تاجىريبە الماسۋ جانە كاسىبي بايلانىستى نىعايتۋ، سونداي-اق سوت ورىنداۋشىسى مارتەبەسىنىڭ ماندىلىگىنە مەملەكەتتىك ورگانداردىڭ نازارىن اۋدارۋ.
2009-جىلى ءبىلىم، عىلىم جانە مادەنيەت جونىندەگى يسلام ۇيىمى (ISESCO) الماتى قالاسىن 2015-جىلعى يسلام مادەنيەتىنىڭ قالاسى دەپ تانۋعا شەشىم قابىلدادى. بۇل جونىندە ISESCO- نىڭ باس ديرەكتورى ابدەل ءازيز ءات-تۋەيدجري قازاقستان رەسپۋبليكاسىنىڭ ماروككوداعى توتەنشە جانە وكىلەتتى ەلشىسى (مىندەتىن قوسا اتقارۋشى) باقتيار تاسىموۆپەن كەزدەسۋىندە حابارلاعان.
2012-جىلى مەملەكەت باسشىسى نۇرسۇلتان نازاربايەۆ «ەكسپو-2017» حالىقارالىق مامانداندىرىلعان كورمەسىنە ازىرلىك جانە ونى وتكىزۋ جونىندە مەملەكەتتىك كوميسسيا قۇرۋ تۋرالى جارلىققا قول قويدى.
2014-جىلى ۆەنگريا استاناسى بۋداپەشتەگى «كورۆينۋس» ەكونوميكا ۋنيۆەرسيتەتىندە «بەلگىسىز قازاقستان» العاشقى شەتەلدىك فوتوكورمەسىنىڭ رەسمي اشىلۋ سالتاناتى بولدى.
قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورىنىڭ قولداۋىمەن ءبىر توپ كاسىبي فوتوسۋرەتشى تيان-شاننان كاسپي تەڭىزىنە دەيىنگى ۇلان-عايىر تەرريتورياعا ەكسپەديتسيا ۇيىمداستىرۋ مۇمكىندىگىن الدى.
2015-جىلى حالىقارالىق تۇركى اكادەمياسى ISESCO بايقاۋشىسى مارتەبەسىن الدى.
يسلام ءبىلىم، عىلىم جانە مادەنيەت ۇيىمىنىڭ (ISESCO) قىزمەتى - يسلام ەلدەرىندە عىلىم مەن ءبىلىمدى جانە مادەنيەتتى دامىتۋعا باعىتتالعان.
2015-جىلى الماتىدا 1 - ECOTANBA تيپىندەگى العاشقى ەكولوگيالىق ماركالاۋ باعدارلاماسى تانىستىرىلدى.
ECOTANBA ەكولوگيالىق ماركاسى - ەكولوگيالىق تازا ونىمدەردى، قىزمەتتەردى جانە پروتسەستەردى سەرتيفيكاتتاۋدىڭ قازاقستانداعى العاشقى ءارى بىردەن-ءبىر ەرىكتى جۇيەسى. ونى «EcoStandard» قوعامدىق قورى ىسكە اسىرادى.
2018-جىلى «قازاقپارات» ح ا ا استانا تەلەارناسىمەن بىرىگىپ «عاجايىپ قازاقستان» دەرەكتى فيلمدەر توپتاماسىن تۇسىرە باستادى.
ءتۇسىرۋ توبى قازاقستاننىڭ ءار تۇكپىرىندە بولىپ، شالعاي اۋىلدارداعى ادامدارمەن تىلدەستى. قۇس قاناتى عانا جەتەتىن تۇمسا تابيعاتتى تاسپاعا ءتۇسىردى.
«عاجايىپ قازاقستان» - بۇل قازىرگى قازاقستاننىڭ قۇپياسى اشىلماعان تابيعاتى، تىلسىم كۇشكە جانە شەشىلمەگەن جۇمباققا تولى عاجايىپ ورىندارى، سونداي-اق جاراتىلىسى ەرەكشە ادامدار. ەلىمىزدىڭ بارلىق وڭىرلەرىنەن سىر شەرتەتىن بىرەگەي ۆيدەووچەرك 25 بولىمنەن تۇرادى.
