قازاقستان مەن تۇركيانىڭ ديپلوماتيالىق بايلانىس ورناتقانىنا - 27 جىل
ودان بۇرىن، 1991 -جىلى 16 -جەلتوقساندا تۇركيا قازاقستاندى تاۋەلسىز ەل رەتىندە تانىعان بولاتىن، دەپ حابارلايدى قازاقپارات قازاقستان رەسپۋبليكاسىنىڭ تۇركياداعى ەلشىلىگىنە سىلتەمە جاساپ.
«قوس حالىقتىڭ تاريحى، ءتىلى مەن مادەنيەتى - تامىرلاس، دۇنيەتانىمى مەن تۇسىنىگى - جاقىن. سوندىقتان ورتاق بولاشاقتى بىرگە باياندى ەتۋگە باعىتتالعان بىرلەسكەن جۇمىستى جۇرگىزۋىمىز زاڭدى. 27 جىل ىشىندە قازاق- تۇرىك بايلانىستارى ساۋدا- ەكونوميكا، كولىك- ينفراقۇرىلىم، تۋريزم، مادەنيەت، ءبىلىم بەرۋ، قاۋىپسىزدىك جانە تاعى باسقا سالالاردا قارقىندى دامىپ، بۇگىندە جان- جاقتى ستراتەگيالىق ىنتىماقتاستىق دەڭگەيىندە جالعاسىپ جاتىر. 1992 -جىلى 30 ميلليون ا ق ش دوللارىمەن باستالعان ەكىجاقتى ساۋدا كولەمى قازىرگى تاڭدا 2 ميلليارد دوللار دەڭگەيىنەن اسىپ ءتۇستى»، - دەلىنگەن ەلشىلىكتىڭ تاراتقان باسپا ءسوز حابارلاماسىندا.
ەلباسى نۇرسۇلتان نازاربايەۆتىڭ 2009 -جىلى تۇركياعا جاساعان رەسمي ساپارى ىنتىماقتاستىعىمىزدى جاڭا دەڭگەيگە كوتەردى. ساپار بارىسىندا قازاقستان مەن تۇركيا اراسىندا ستراتەگيالىق ارىپتەستىك تۋرالى كەلىسىمگە قول قويىلدى. پرەزيدەنت ن. ءا. نازاربايەۆتىڭ تۇركياعا 2018 -جىلعى رەسمي ساپارى شەڭبەرىندە ەكى ەل اراسىنداعى جوعارى دەڭگەيلى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسى ءوتتى.
قازاقستاننىڭ تۇركياداعى ەلشىلىگىنىڭ مالىمەتىنشە، ەكى ەلدىڭ حالىقارالىق ارەناداعى ۇستانىمدارى دا استاسىپ جاتىر. قازاقستان مەن تۇركيا ءبىر-ءبىرىنىڭ حالىقارالىق باستامالارىن ءوزارا قولداپ كەلەدى. بۇۇ، يىۇ، ەقىۇ، ءاوىسش، ەىۇ سياقتى ۇيىمدار شەڭبەرىندەگى ىقپالداستىعىمىز دامىپ كەلەدى. استانا ۇدەرىسى جاھاندىق تۇراقتىلىققا ۇلەس قوسىپ وتىرعان ءتيىمدى تەتىك ەكەنىن دالەلدەدى. تۇركى جاقىنداسۋىنىڭ باستى ساياسي ۇيىمى سانالاتىن تۇركى كەڭەسى ەلدەرىمىزدىڭ باستاماسىمەن قۇرىلدى.
«بۇگىندە قازاقستان مەن تۇركيا ەۋرازيالىق كەڭىستىكتىڭ ماڭىزدى دا بەدەلدى ويىنشىلارىنا اينالدى. قازاق- تۇرىك قاتىناستارىنىڭ ەلدەرىمىزدىڭ ۇلتتىق مۇددەلەرى جولىندا ودان ءارى دامىپ بەكي بەرەتىنىنە سەنىمدىمىز»، - دەلىنگەن حابارلامادا.
