پرەزيدەنت ەكى كۇندە 27 كەزدەسۋ وتكىزىپ، 3 ءىرى شاراعا قاتىستى
ونىڭ ايتۋىنشا، 20- قىركۇيەكتىڭ باستى وقيعاسى بىرىككەن ۇلتتار ۇيىمى باس اسسامبلەياسى 77-سەسسياسىنىڭ جالپى دەباتى بولدى. قاسىم-جومارت توقايەۆ اتالعان شارادا ءسوز سويلەپ، بىرنەشە جاھاندىق وزەكتى ماسەلەنى كوتەردى.
پرەزيدەنت ءوز سوزىندە بۇرىننان قالىپتاسقان الەمدىك قاۋىپسىزدىك جۇيەسىن قالپىنا كەلتىرۋدىڭ، تەرريتوريالىق تۇتاستىقتى ساقتاۋدىڭ، ەلدەردىڭ ەگەمەندىگىن قۇرمەتتەۋدىڭ ماڭىزدىلىعىن اتاپ ءوتتى.
سونداي-اق مەملەكەت باسشىسى ازىق-تۇلىك جونىندەگى جاھاندىق سامميتكە دە قاتىسىپ، ءسوز سويلەدى. پرەزيدەنت الەمدىك نارىقتاعى قازاقستاننىڭ ءرولىن اتتىرۋعا باعىتتالعان بىرنەشە ۇسىنىس ايتتى. ول ەلىمىزدىڭ استىق جانە باسقا ازىق-تۇلىك تۇرلەرىن تۇراقتى جەتكىزۋىنە، ترانسكاسپي حالىقارالىق كولىك باعىتىن دامىتۋعا قاتىستى بولدى.
جالپى، بيىلعى شەتەلدىك ساپارلاردا پرەزيدەنت ەڭ ءجيى كوتەرگەن ماسەلەنىڭ ءبىرى - كولىك- لوگيستيكا ماسەلەسى. ياعني، بۇگىنگى كۇردەلى گەوساياسي جاعدايعا قاراماي وتاندىق تاۋارلاردى الەمدىك نارىققا شىعارۋدىڭ جاڭا جولدارى ۇنەمى قاراستىرىلىپ جاتىر. سەبەبى بۇل ەل ەكونوميكاسىنا تىكەلەي ىقپال ەتەتىن ماڭىزدى فاكتور.
بۇدان بولەك، بۇگىن مەملەكەت باسشىسى ب ۇ ۇ باس حاتشىسى انتونيۋ گۋتەرريشپەن، ەۋروپالىق كەڭەستىڭ پرەزيدەنتى شارل ميشەلمەن، ەۋروپالىق كوميسسيا پرەزيدەنتى ۋرسۋلا فون دەر ليايەنمەن، اۆستريا پرەزيدەنتى الەكساندر ۆان دەر بەللەنمەن، حالىقارالىق قىزىل كرەست كوميتەتىنىڭ پرەزيدەنتى پيتەر ماۋرەرمەن كەزدەسىپ، ەكىجاقتى ماسەلەلەردى تالقىلادى. سونداي-اق يوردانيا كورولى IIابداللامەن، قاتار ءامىرى تاميم بين حاماد ءال تانيمەن اڭگىمەلەستى.
«جالپى، پرەزيدەنت سوڭعى ەكى كۇندە 27 كەزدەسۋ وتكىزىپ، 3 ءىرى شاراعا قاتىستى»، - دەپ جازدى مەملەكەت باسشىسىنىڭ باسپا ءسوز حاتشىسى.
