جامبىل وبلىسىندا 26 جىلقى جاي ءتۇسىپ قىرىلىپ قالدى
وقيعا تۇرار رىسقۇلوۆ اۋدانىنداعى تاۋلى ايماق - تەرەڭوزەك اۋىلىنىڭ ماڭىندا بولعان.
جۇرتشىلىق ەندى اقادال مالىنىڭ اقىسىن كىمنەن وندىرەرىن بىلمەي دال.
نۇربولات مىرزاقۇلوۆ 20 جىلدان بەرى باقشا ەگىپ، مال شارۋاشىلىعىمەن اينالىسادى. شارۋا وسىدان ەكى جىل بۇرىن اۋىلداعى ەكى ءۇيىن كەپىلگە قويىپ، 3,5 ميلليون تەڭگە كولەمىندە جەڭىلدەتىلگەن نەسيە العان. وعان جىلقى مالىن ساتىپ العان. ءبىراق وقىس وقيعادان 10 جىلقىسى ءولىپ، قوراسى قاڭىراپ قالدى. شارۋا مۇنداي جاعداي ايماقتا العاش رەت بولعانىن ايتادى.
«ويدا جوقتا مىنە، قيراتىپ تاستادى. 5 ميلليون شىعىنعا ۇشىرادىم. ەندى نە قويىپ بەرەم، بىلمەيمىن. اۋىلدا كىشىگىرىم تام بار ەدى. ودان اجىراپ قالسام مىنا بالا- شاعاممەن قايدا بارامىن؟»، - دەيدى شارۋا.
ن. مىرزاقۇلوۆ قوسا اۋىلداعى 7 ءۇيدىڭ 26 باس جىلقىسىن نايزاعاي سۇلاتىپ تۇسىرگەن.
قىرىلعان مالدىڭ قۇنىن كىمنەن داۋلارىن بىلمەگەن تۇرعىندار اۋدان اكىمدىگىنەن كومەك سۇراپ وتىر.
«اۋدان اكىمىنىڭ ارنايى تاپسىرماسىمەن كوميسسيا قۇرىلدى. كوميسسيا قۇرامىنا قۇزىرلى ورگاندار مەن زاڭگەر ماماندار ەندى. قازىر زەردەلەۋ جۇمىستارى جۇرگىزىلىپ جاتىر. ماسەلە اۋدان اكىمدىگىنىڭ تۇراقتى باقىلاۋىندا. قازىر اۋىل اكىمدىگى مەن ۆەتەرينارلاردان قۇرىلعان ارنايى جاساق، قانداي دا ءبىر اۋرۋ تاراماۋ ءۇشىن ولەكسەلەردى سول تاۋ شاتقالىندا كومىپ جاتىر. سەبەبى جىلقىلار جايىلعان بيىكتىككە كولىكپەن جەتۋ مۇمكىن ەمەس»، - دەدى ت. رىسقۇلوۆ اۋدانى اكىمىنىڭ ورىنباسارى الىبەك تەرلىكبايەۆ.
